城中熱話全部係講特首請辭，人人各抒己見。中環行一圈，消息聽唔切，精警嘅亦唔少。即如渣打銀行行政總裁蘇利民噚日被人問到董先生落台會唔會影響金融市場時，呢位新大班話：「香港金融市場受到好多人影響，特首只係其中一個，正如艾爾敦（滙豐亞太區主席）就嚟卸任，但都唔見得會影響到滙豐啦！」
蘇利民係銀行家，講嘢同諗嘢都同銀行有關。八方聽完佢講，心諗如果特首係艾爾敦而唔係董建華，咁特區一定唔會搞到今日咁；行政會議點都有番一兩個重磅銀行家，大家正正經經開會，而唔係你唔順我我唔順你，開會冇人緊張，開完會就有人洩密。
講到行會，你估佢哋幾時知道呢單宮廷政變？答案係遲過傳媒。當然，個別另有靈通消息嘅成員上個禮拜中收到風，但亦半信半疑。事關阿董連公開喺立法會罪己咁難頂嘅事都捱過，冇理由喺經濟轉好財赤消滅，而迪士尼又就快開張時劈炮；就算呻都係講吓，以前都試過口頭話意興闌珊，但目的係等中央安撫，攞吓着數；點諗到今回有人造反，有人又乘機弄假成真。
未來局棋點捉，真係好有趣，喺中央要穩定大前提下，當然人事暫時變得愈少愈好，但各路英雄，又點肯跟個二五仔做二加五年呢？好似不擅擦鞋嘅唐少爺，咁辛苦搞掂盤數，掙得財政盈餘，點知係幫人作嫁衣。刻下佢份預算案應該完成咗九成九，但個老闆唔知係邊位，未來兩周行會又唔開，咁十六號就宣布，你估佢會唔會大減稅累鬥累呢？
（圖）唐少爺辛辛苦苦搞掂盤數，𠵱家可能得番個桔。
傳真︰2623-9278
電郵︰