李亞鵬嘅哥哥李亞偉日前承認咗王菲同李亞鵬喺北京籌備緊婚禮，李亞鵬喺北京有間公司，王菲幾乎日日都陪李亞鵬返工。噚日下晝六點左右，李亞鵬同王菲一齊搭𨋢落公司嘅停車場，睇嚟李亞鵬心情好靚，一路行一路吹口哨，佢哋一直行到停車場最隱蔽嘅地方攞車，記者上前影相，王菲即時戴上墨鏡，問佢哋兩個結婚嘅事，李亞鵬就耍手冇回應。
有王菲嘅朋友向內地傳媒爆料，話王菲其實唔係為咗結婚而唔唱歌，佢只係想過平凡人生活，同埋唔想再過俾大眾指指點點嘅日子。而有王菲fans喺網上留言話：「祝福你，知道你要結婚了，有點不是味兒。但我知道這是你自己的事情，希望你永遠開心。」
而曾經同李亞鵬拍拖嘅內地演員周迅，日前接受內地傳媒訪問時就自爆同李亞鵬分手後曾患自閉症，佢話：「那時候我幾乎不說話，持續了兩年時間。我一直不願意跟人交流，因為那時候真的不希望有其他的聲音，一個人甚麼都不想，就是發呆，只能聽淡淡的音樂。」
日籍女星瀨戶朝香噚晚喺台灣出席電影《鬼來電2》首映，同何潤東一齊行紅地氈，佢哋邊行邊同現場觀眾打招呼，好鬼親切。何潤東喺日本拍戲時同瀨戶朝香喺片場朝夕相對，瀨戶朝香話：「Peter（何東潤）很溫柔，我的英文不流利，但他很有耐心地與我溝通。」
吳浩康（阿Deep）噚日到新城接受訪問，佢日前俾鄰居報警投訴發出噪音，阿Deep話佢原本打算親自向鄰居道歉，但係管理處方面就話唔係咁方便公開住戶嘅資料，所以阿Deep只好承諾下次唔會再喺晚上彈琴練歌，佢重話爹哋叫佢不如搬去工廠住，就包唔會俾人投訴。
陳可辛同華迪摩根製作公司合夥人麥禮安（AndreMorgan）噚日喺尖沙嘴舉行金像電影《擊情》記者會。陳可辛喺會上大談同麥禮安合作嘅原因，佢話：「當初我哋喺北京會面，佢問我有冇興趣做呢部戲嘅香港發行，由於佢身上冇正版，所以就喺北京買咗隻盜版畀我睇。」
趙薇舊年嗰單涉嫌毆打孕婦鄒雪事件哄動一時，當事人鄒雪入稟法院要求趙薇同佢嘅司機吳珏賠償二千幾蚊醫藥費，同要求佢哋公開道歉，案件前日喺北京開庭，但當事人之一嘅趙薇唔止冇出庭，而且重飛咗去日本度假，莫非佢對呢次官司好有信心？
吳大維同徐懷鈺嘅戀情，維持咗七、八個月就告分手收場，問吳大維有冇復合可能？佢話：「不可能，分了就是分了！」對於日前吳大維又俾人影到佢同一名長髮靚女消遣，問佢哋兩個有冇發展機會，吳大維話：「除了睡覺和死亡是絕對肯定的，其他一切anythingispossible（任何事都有可能發生）。」
