英國花街朱古力廠每年都會喺三月搞一個「最佳名人母親」選舉，上年年底同Westlife前成員、沙沙滾嘅BrianMcFadden離婚嘅KerryKatona第二次獲選為冠軍。除此之外，英女皇伊利沙白二世、啱啱為萬人迷碧咸（DavidBeckham）誕下第三名公子嘅Victoria都分別打入五強。
二十四歲就已經生咗兩個囡囡兼飽歷離婚傷痛嘅Kerry，繼○二年之後，第二次獲全英選為「最佳名人母親」。據講Kerry今次得到全英師奶力撐，真係要多得佢前夫Brian，因為時時偷食嘅Brian喺離婚後即時搭上澳洲女歌手DeltaGoodrem，令曾經為兩個女而放棄大好演藝事業嘅Kerry贏盡萬千英國師奶嘅同情。前日佢攞獎時話離婚令佢覺得女人要自強：「當你有細路時就要識得自強，就算我心情幾差，我仍然視照顧囡囡為我嘅首要任務。」
另外，高高在上嘅英女皇伊利沙白二世今次被選為第四位，一向不苟言笑嘅女皇最近批准皇儲查理斯再婚，應該為佢拉高唔少票數。此外，碧咸嘅老婆Victoria今年穩守第五位，唔少人認為佢上年對俾負面新聞纏身嘅老公默默支持，非常難得。