老董唔做特首大概會成為事實，本來受市民歡迎，股市應該賀吓。奈何剩低接班人任期長短問題又引起爭拗，驚住演變成政治風波。投機市場最怕不明朗因素，結果恒指是日又散161點。1周下來，恒指散426點，幾傷吓。
中企P輪：國企指數同恒指難兄難弟，跌幅差唔多。中海發展（1138）、中海集運（2866）、鞍鋼（347）同深高速（548）4隻國指成份股逆市升，冇法子撐住指數。1隻國壽（2628）嘅跌幅，已經着咗國指跌幅嘅5分1。
想喺中企指數窩輪上做嘢，好困難。國指收4951，估計重有下跌空間，有機會下試4870，並且要睇吓守唔守得住，C輪博唔過。如果睇淡國指而想買中企P輪，又冇乜得選擇，成交金額普遍太細。冇錯，3785金額有成8球，但溢價11.8%，買唔落手。呢隻仙輪，收6.4仙，上落好快。過多一段時間，溢價收縮好易輸錢，除非認為國指日日跌1-2%，否則唔賭冇蝕底。
國壽P輪：國壽跌0.15元，跌幅2.8%，C輪隻隻跌，3-4月份到期而槓桿率較大嘅，跌幅達4成至5成以上。大陸股票唔得，國壽好難有大作為，C輪買唔過。如果正股跌得厲害，要博反彈，3794係主角。暫時睇淡國壽，要買P輪，則揀3706，6月下旬到期，輪價39仙，溢價3.7%，槓桿率13.3倍（有效7.7倍），引伸波幅25.4%。
恒生C輪：恒生銀行（011）叻過阿媽滙控（005）好多，全周埋單只係唔見1.5元。恒生C輪好少，勉強睇得上眼嘅有3850，不過正股冇乜點跌過，C輪買唔過，交投靜亦係不利短炒。
章盛