民主黨前主席馬丁（圖）身為香港數一數二嘅大狀，日前竟然因頂上董建華嗰個特首任期應該係兩年定五年而老貓燒鬚，初時話應該釋法，後來又急急澄清因為未瞓醒而講錯嘢，唔少老友都話馬丁千年道行一朝喪！八方得悉馬丁當日真係唔夠瞓，事關法援署搵佢幫長毛打違反公安法上訴終審法院單案，馬丁之前一晚睇完一大叠文件同判詞，已經差唔多到天光，瞓唔夠兩個鐘頭就俾電台call佢講嘢，一時未清醒，咁就衰咗。
民主黨另一前主席楊森亦話老董下台消息好突然，日日都有新發展，馬丁一時講錯情有可原。佢又指，若然北京再釋法，成本《基本法》丟咗都得嘞，因為有乜理由被奉為小憲法嘅法律性文件，可以隨時釋法？
傳真︰2623-9278
電郵︰