昨日掛牌的I.T（999）總算冇令捧場的股民失望，最高見過2.55元，收2.25元，比起招股價1.95元，高出15%，就算入飛抽得唔多，但都叫做有多少執，至於噚日先至撲入去買的股民，暫時就要坐艇。
另外，近排航運股表現強勁，多間公司陸續公布業績，盈利增長都甚為驕人，好似金輝（137）及太平洋航運（2343）業績靚時派息亦唔錯，所以近排股價頻試高位。
至於下周二公布全年業績的中海集運（2866），江湖傳聞業績亦飲得杯落。經紀黃話，可以列入短炒對象。
中海集運股價近排跟隨其他航運股造好，噚日跌市亦升0.73％，收3.45元，成交1.79億元。
雖然航運股好景，但經紀黃話只將中集列入短炒對象，佢問小初，記唔記得中集去年中上市之時，撞正市況唔好，要降低集資金額，兼夾一掛牌股價就潛水，家陣業績靚，股價又正斗，公司分分鐘會趁勢抽水集資。
慕容小初