電子B最近好好笑容，唔係因為工廠生意好，接單順利，而係因為高爾夫球技藝最近進步神速，頻頻打出九十、九十幾桿，與三位數字講拜拜。電子Ｂ話業精於勤，有空就到東莞打波，日子有功，唔似得會計Ｌ咁，為咗做核數，上去大陸每日做足十八小時，幾乎忘記咗點樣揮棒；上星期六忙裏偷閒，與電子Ｂ較技，洞洞失手，打出個百二桿，雙手掩面而回。
電子Ｂ當然牙擦擦。會計Ｌ晚上食飯之時見到電子Ｂ太太在座，乘機報仇：「Ｂ太，小心啲呀，男人上內地打波，有句順口溜：天光朝早去打波，中午周身骨痛玩按摩，晚上到卡拉ＯＫ唱歌，費事聽老婆喺電話囉囌，幾年之後唔知道上面仔女有幾多！你睇住阿Ｂ，唔好成日放佢去東莞打波呀！」
電子Ｂ為之吹鬚睩眼，但唔敢出聲，驚住會計Ｌ再講得深入啲！連忙轉移話題，唔講打波，講政治，講到自由黨、民建聯認為曾蔭權補任特首之後，任期只應有兩年。會計Ｌ話：「我時常人在上海、北京，混得多咗，知道北京對香港政壇最頭痛嘅，唔係怕民主派造反，佢哋知道秀才造反十年不成，況且已掌控一切工具，使乜騷你民主派？冇有怕。最大問題來自左派，呢類人成日諗住要上位，香港回歸八年，輪都輪到佢哋話吓事啦，點解重係港英餘孽、忽然愛國嘅風派緊握肥缺、大權？香港左派人士之中，不少人有北京靠山，靠山為香港契仔四處活動，講好說話，爭取權位，內鬥劇烈，搞到中央當權派不勝其擾，但又唔好意思公開叫佢哋呢班人查找不足，你話煩唔煩！」
會計Ｌ之言，有左派賓架Ｋ之言為證，賓架Ｋ係老愛國，根正苗紅，佢話好多新紮愛國派確係為咗要上位而為中央在幕後添煩添亂也。