昨日歐洲沽盤午後湧現，恒指跌幅擴大至161點，收報13730，成交達225億元。講業績，近排本港藍籌公布的業績其實好到不得了，擁有大笨象身形的滙控（005）全年盈利增長35%至922億元，新地（016）中期盈利更增長95%至55億元，但無奈投資者要求高，認為業績僅符預期要沽貨，加上再有資金流出本港以及油價高企，投資者當然趁高沽貨為上。
黑客話，外資減持港股，自然會將資金調走至美元套息，相信現時接近80億元的結餘，唔使好耐就會被清袋，一旦香港大幅加息，港股再挫，資金又再流出，在這惡性循環下，港股要翻身都幾難，短期之內相信是淡友天下。
香港特首任命以及日後政局尚未明朗，但可以肯定是阿董辭職後將有新發展，毋須返回東方海外（316）主持大局，前景如斯明朗，股價再升4.87%，創36.60元新高。
139控股（139）噚日正式通過以5億元向中旅（308）收購澳門京澳酒店，139控股一開市就急升21%至6.3仙，收報5.2仙，升幅收窄至1.92%。收購代價中一半畀現金，一半發換股債，行使價1角，若悉數行使，中旅將成139大股東。現時未到價，當然冇理由行使，唔知會否成為139炒上的誘因呢？
招股逾800倍超購的I.T（999）噚日掛牌，一開市就嘜高至2.50元，彈至2.55元已無力再上，跟住掉頭回落，以接近全日低位2.25元收市，只較招股價1.95元高15%。噚日追貨者大部份要損手。
阿虎