今日投資者最關注的，當然就係近期最矚目的新股I.T（999）首日掛牌上市。講起呢隻新股，小初好多朋友都好唔高興，皆因入咗大飛都係分得雞碎咁多，就算隻股今日勁升都係賺餐茶，搞完一大輪都唔知為咩。
除咗I.T熱賣，查實好多本地零售股表現都好靚仔，但剛宣布業績好過預期，兼有唔錯股息派發的利福國際（1212）就斯人獨憔悴，股價連續跌咗兩日。經紀黃話，其實芬佬同分析員對隻股評價都唔差，好幾間證券行更將目標價調升至14元樓上，股價唔應該咁肉酸。
利福剛於日前公布全年業績，盈利有成4.4億元，比去年上升60.7%，除末期息12.1仙外，又派發特別股息8.6仙。
經紀黃話，可能係利福公布業績前股價升得太急，由11元衝上13.50元，業績公布後，有人趁好消息出貨，所以股價先至咁弱。噚日再跌3.2％，收12.10元。
利福除咗即將在尖沙嘴開設崇光百貨，聽講會在香港區以及澳門分別開多間崇光。另外，或者會在北京開多間久光百貨。
慕容小初