近年主力在荷李活及歐美發展的動作指導熊欣欣，早前為徐克新片《七劍》擔任動作指導，及兼任黎明替身。其間熊欣欣教楊采妮舞劍時，不慎刺爆對方口角，滲出絲絲血水，令他十分內疚。
熊欣欣近日為徐克執導、楊采妮（Charlie）和黎明（Leon）主演的電影《七劍》擔任動作指導，教Charlie舞劍之餘，更兼任黎明的替身。談及今次到新疆拍攝的經歷和感受時，熊欣欣坦言既驚險又內疚。
熊欣欣說：「早排Charlie拍攝一場用劍打鬥嘅場面，我教佢舞劍嘅時候，唔覺意刺到Charlie左邊口角，見到佢有血水滲出，我真係好驚好內疚，始終人哋係女仔，我好驚整花Charlie塊面。點知當時Charlie反而安慰番我轉頭，話只係揩親吓，好小事，叫我唔使擔心，咁我先至放心啲咋。」
熊欣欣指Charlie不但表現堅強，而且更勤力非常，如Charlie知道片中經常要騎馬和舞劍，所以特地花數星期練習，熊欣欣說：「Charlie同Leon一樣，拍動作方面都好有天份，拍攝出嚟效果好好。」
至於驚險場面方面，熊欣欣指擔任黎明替身、在海拔三千呎的雪山滾下來一幕，最令他難忘。熊欣欣說：「個雪山好斜，單單行上雪山，已經要花成三個小時，但碌落嚟嗰吓就只係幾十秒時間，記得當時我碌落山嗰陣，唔單止個頭撞到石頭，而且又因為處身位置好高，我一度缺氧唞唔到氣，工作人員要即時畀氧氣我吸，好在呢場戲拍攝好順利，一次就搞掂。」
採訪：戴彩煥
