前晚西甲聯又見維拉利爾嘅科倫入波，重係靠呢球反勝馬略卡，為球隊全取三分，科倫今季由英超聯曼聯過到去西班牙發展都可謂正確決定；目前更加喺射手榜追貼首位嘅伊圖，一陣贏埋呢個獎，就真係吐氣揚眉嘞。
呢位烏拉圭前鋒喺近幾個月狀態「着晒火」，頻頻入波，𠵱家已經以十六個聯賽入球，追貼到以十七球領先聯賽射手榜嘅伊圖，都咪話無機會趕過對方。諗番起佢之前喺曼聯係咁俾人噓俾人笑，𠵱家真係乜都攞番晒。
查實佢未去曼聯之前，喺南美球壇已經有極佳表現，相信係因為英國波風格令佢難以適應，大家當日咪以為佢淨係識得門前射高撻Q做敗家仔啫。
時速成144公里
相信球迷日前都有睇到卡路士對貝迪斯時嗰腳炮彈式入球，賽後西班牙傳媒話入球時速成一百四十四公里，打破咗佢上季對馬拉加時，那記入球時速一百一十九公里嘅紀錄，成為西甲最「快」入球，但就打破唔到佢○二年世盃對中國時，高達一百四十九公里時速嘅入球。卡路士已經喺球壇打滾多年，罰球依然又準又勁，我求大俠認真佩服！
彭拿治要踎監練波
因醉酒兼無牌駕駛而被罰入獄三個月嘅伯明翰英格蘭年輕中場彭拿治，𠵱家佢班律師團幫佢搞緊上訴；而萬一佢真係要坐三個月監嘅話，伯明翰方面都唔使驚佢喺放監之後嘅狀態會下滑。點解？聽講原本效力阿仙奴嘅佢坐嘅活希爾監獄，裏面有個全天候嘅足球場，佢一得閒咪可以同其他囚犯踢吓波，唔使怕第日出返嚟球技會生疏。
4萬球員自己話事
向來足球先生選舉都係由記者或教練選出，最近，國際球員工會（FIFPRO）宣布今年九月十九日將會喺倫敦舉行首屆FIFPRO世界夢幻隊（十一人）頒獎典禮。獎項除咗夢幻十一人外，重有最佳新人等。最特別係淨係全世界四萬位球員有份投票，其他人冇份。我求大俠都覺得係好事，話晒世界夢幻隊選舉係球壇盛事，有咩理由球員冇投票權先！