投資者買樓炒番轉，通常都要求業主畀長啲成交期，方便佢哋有足夠時間，將單位以更高價錢轉售。𠵱家一般成交期係六個月，但最近有單，成交期竟然長到接近一年，認真少見。
單位係深井碧堤半島一期八座E，六百九十呎，成交價一百九十萬，每呎逾二千七。美記羅志強話係市價，但係……明年一月中至完成交易。
照計畀得咁長成交期，業主收貴啲都好正常，但呢個業主就冇咁做，聽講，原來佢已經買咗同屋苑二期樓花，諗住入伙時換樓，一動不如一靜，所以至肯畀長成交期。
羅志強話，買家係投資者，睇好二期入伙後成個屋苑嘅後市，預計價錢可以升到四千幾一呎；若真係升到呢個價，利潤都幾可觀。
蘭西上月提過，歌星蕭正楠年初七參觀元朗悅富豪苑示範單位後，一次過用六百四十五萬，買入兩個單位，包括地下同頂層連天台，地下計劃自住，頂層就諗住用嚟收租。
點知唔夠一個月，已經沽出賺錢。
中記龍智烽話，個頂層以二百二十萬賣咗畀用家，蕭正楠兩禮拜賺十五萬，件貨升值七點三巴仙。單位八百八十八呎，每呎近二千五。
藝人歌星投資物業例子唔少，但短時間「摸售」就少見啲。聽講話，因為買家好有誠意，蕭正楠至肯賣喎！
九龍灣商貿地皮上周高價售出後，區內唔少業主即時反價封盤，外圍商廈造價都「水漲船高」。美記譚炳安話，九龍灣美羅中心二期，最近重出現「摸貨」成交。
佢話，呢個低層四千四百呎單位，上個月中以六百六十五萬賣出，近日以七百五十四萬「摸出」，半個月賺八十九萬，即逾一成三。
上述單位由兩個租客承租，買家計劃約滿後保留其一自用，另一個放租。
譚炳安預期，用家轉租為買，以及外區客流入九龍灣區，會相繼出現。
恒隆陳啟宗噚日喺業績會上話，公司喺大陸遍及三十多個城市尋找投資機會，不過西藏就冇份，但佢今個月會同朋友到當地旅行，由於佢喺美國有間屋位處2500米高，習慣喺高地住，因此唔怕去西藏高原會患上高山症。
佢話，喺天津傾咗大概近兩年嘅大型商場，剛落實投資，點知有個新入行記者問佢，「點解傾咁耐先傾掂」，即刻俾佢窒，「呢位先生，唔知喺大陸做過生意未……用兩年時間攞到個項目，已經算偷笑！」
佢又叫傳媒同生意人，眼界要放遠啲，唔好淨係睇香港，心胸咁狹窄，咁樣好難撈。
至於點先可以具有國際視野？佢叫記者暑假到科大，睇佢同班學生上堂，佢年年都會去教書。
仲量聯行「亞洲投資者信心調查」顯示，大部份受訪城市，未來信心指數都達樂觀或中立水平。
對於中期前景，超過六成受訪者預期，整體回報上升，房地產投資市場持續蓬勃。
調查發現，在一眾城市中，原來投資者最睇好印度孟買同班加羅爾，兩者信心指數喺舊年短觀、同○四至○六年中期都位列榜首。
至於香港，舊年只係得第六位；而○四至○六年期間，就跌至十一位；○三年起計嘅三年，信心排名第四。
地產代理監管局今年七月開始，落實有關提高考試深度嘅安排，唔知係咪咁，搞到唔少人趕喺之前，嗱嗱聲走去報考資格試，總共有一千八百六十六人，報考今個月二十四號嘅資格試。
數字唔單止係對上一次，舊年十一月報考人數嘅三倍，重多過舊年全年嘅一千七百三十九人。
地監局話，本月十七同十八號，重可以接受逾期報名，但要收二百蚊行政費。
地監局專業發展委員會主席曾煥平話，數字反映愈嚟愈多人有意做地產代理。
電郵地址：
