政協會議開幕，阿董坐上主席台，看來成為政協副主席應冇走雞。阿虎重記得佢登上香港特首之位冇幾耐，亞洲金融風暴在泰國開始，席捲整個亞太區，跟住香港衰足咁耐，希望今次祖國鴻福齊天，唔好俾佢累到。
港股噚日牛牛皮皮，收報13892，升41點，成交184億元。滙控（005）雖曾失守128元，低見127.50元，但散戶對滙控長情，逢低就買，最後收報129元，升0.38%，成交達33.3億元。
國企股在兩會開幕總算生性，指數重上5000關，收報5014，升29.28點。
油價升上53美元水平，油股反彈，中石油（857）升1%至4.75元，成交6.75億元，但沽空金額超過1億元，後市料難有突破。海螺（914）續有沽壓，挫2.38%至8.20元。
恒隆地產（101）及新地（016）公布中期業績，前者賺16億元，增長兩倍，後者賺55億元增長95%。兩股增幅雖然驕人，但只是符合市場預期，無驚喜可言，唔知又會唔會好似滙控咁俾大戶糟躓呢？新地噚日冇起跌，收報71.50元，成交6.59億元，沽空接近1億元。
中鋁（2600）周三大跌5.3%至4.925元，噚日再跌0.5%至4.90元，大摩唱淡話要見4.35元。鄧普頓基金周一曾經增持700萬股中鋁，令持股量由4.97%升至5.18%，唔知消息曝光後，會否扭轉中鋁跌勢呢？
先施（244）噚日勁升34%至0.65元，有傳聞話因為利福（1212）升咗唔少，所以先施都要追落後。I.T（999）今日登場，是全場焦點，噚日成衣股普遍先炒高2-8%。
阿虎