奧花雲費做紅娘
荷爾芭莉豬欄相睇

黑人金像影后荷爾芭莉（HalleBerry）同埋佢男友，即係黑人男星米高伊利（MichaelEaly）合作嘅電視電影《TheirEyesWereWatchingGod》，前日喺荷李活舉行首映。今次係荷爾同拍拖大半年嘅男友首度齊齊出席公開場合，不過佢兩個見到成棚記者即時變得鬼咁怕醜，居然連合照都唔肯影番張！

傳已同居
喺戲裏面扮演村姑嘅荷爾，前日一身嬌俏打扮同男友米高前後腳到場，擺明唔想講佢哋嘅戀情，其實佢兩個有傳喺早排已經共賦同居，但唔知點解硬係唔肯公開戀情。呢套片係由黑人名嘴奧花雲費（OprahWinfrey）監製，亦可以話係荷爾同米高嘅定情之作，因為劇情安排荷爾同米高有一場激情肉搏戰，令佢兩個因而撻着，據講荷爾初頭唔肯拍呢套電視電影，不過佢畀面奧花雲費先至肯接，換句話講，奧花雲費可算係荷爾同米高嘅紅娘。

扮演村姑
呢部戲係以二十年代美國鄉村為背景，荷爾喺片入面扮演一個受盡種族歧視嘅村姑，佢重要經常流連豬欄，搞到自己污糟邋遢，好彩有男友米高安撫佢寂寞的心。