英皇娛樂集團老闆楊受成噚日六十一歲生日，前晚英皇群星Twins、謝霆鋒、Boy'Z、鄭希怡（Yumiko）、吳浩康、梁洛施（Isabella）、李逸朗（Don）同譚耀文等，重有成龍、毛玉萍、章小蕙同楊超成加埋過半百賓客，齊集駿景酒店開P，為楊受成賀壽，容祖兒就因身在雲頂開演唱會未能出席。
臨近凌晨十二點，侍應推出由英皇藝人送出嘅生日蛋糕，蛋糕上面署名「一班二打六」祝「楊生生日快樂、身體健康」，甚為搞笑，之後楊受成由太太陸小曼陪伴切蛋糕，楊受成重錫咗太太一啖，之後又有Twins高歌助興，場面熱鬧。
Yumiko前晚就同成龍、吳浩康兩位新舊緋聞男友同場，不過佢同二人都有打招呼，另一對曾傳緋聞嘅霆鋒同阿Sa就各有各玩，阿Sa掛住唱K，霆鋒就同阿嬌、吳浩康打桌球。
老細生日，群星當然各攜賀禮到會場，吳浩康送咗件底衫畀楊受成保暖、Don送領呔，Yumiko、Boy'Z同Isabella則送自製心意卡，但最闊綽同最惹笑嘅都係Twins，阿嬌嘅禮物雖然係用ChristianDior嘅袋入住，但入面裝住嘅其實係幅畫，阿Sa就用Cartier嘅紙袋裝禮物，重猛同老細講話袋中禮物同個紙袋冇關，結果佢原來係送咗對名牌袖口鈕畀楊受成，而譚耀文就啱啱喺廣西趕返香港，所以佢講笑話暫時送住兩梳蕉先。
利嘉兒同DJ周國豐共墮愛河後，不時以幸福女人姿態示人，佢早前接受《HIM》雜誌訪問，話男友係最完美嘅男人，絲毫冇需要改善嘅地方，利嘉兒話：「向來我都好鍾意小動物，尤其係狗，不過我男友天生鼻敏感，醫生話會危害健康，但佢為咗見我，嚟到我屋企寧願食藥，都冒住生命危險同我隻狗玩，所以佢同我兩隻狗都係我嘅最愛。」
余文樂一直緋聞多多，但去年只得黃伊汶一個緋聞女友，不過呢啲都可能係暴風雨前嘅先兆。余文樂噚日去新城時就自爆話：「我收到消息有傳媒開我file，話我追番以前女友，但嗰個女仔係邊個我唔知，可能記者見我呢排冇發市！」余文樂重話呢件事，唔怕黃伊汶唔開心，佢話：「其實有穩定嘅緋聞女友都好吖﹗」
導演劉偉強同麥兆輝噚日為電影《頭文字D》舉行記者會，主角周杰倫雖缺席，但兩位導演卻喺會上大談周侯戀。劉偉強話要先多謝周杰倫冇喺拍《頭》片期間談戀愛，否則對方可能經常掛住打電話，佢又話周杰倫戀聞近期炒得正盛，剛好幫到電影宣傳。而由於周杰倫喺片中要展示飆車飄移技術，在日本拍外景時，就曾撞毀兩部汽車，好彩人冇事。
葉蒨文（沙麗）早前喺內地開完演唱會，嚟緊又會同香港管弦樂團合作，喺香港舉行個唱。沙麗日前接受商台訪問，講起自己最近顧住打波keep弗，夜晚霸住間房做按摩，搞到要同老公林子祥（阿Lam）分房瞓。而當沙麗提到生BB呢個話題，今次就唔講老友朱玲玲兩個仔，不過一提到成龍個仔房祖名就好激氣，佢話：「成龍個仔，年都唔同我拜，佢係晚輩，係我契仔，應該同我拜年，我𠵱家唔睬佢。」
