現年二十一歲的雷凱欣憑32D驕人上圍，躍身成為新一代波霸，但近期有傳她曾隆胸和整容，雷凱欣對此否認說：「我有隆胸就唔使墮啦！」不過她卻承認因為貪靚，計劃稍後到台灣割雙眼皮。
雷凱欣雖然年僅二十一歲，但其32Ｄ豐滿上圍卻在圈中「傲視同儕」，旋即被封為新一代波霸。不過近期有傳雷凱欣曾隆胸和整容，日前她在將軍澳接受訪問時，表示亦聽過這傳聞。
雷凱欣說：「啲人話我隆胸，我有錢就將雙腿整長幾吋，我有隆胸就唔使墮啦！隆得胸就唔爭在抽埋脂肪、磨埋腮骨，唔使俾人話塊面肥。以前啲人咁講我，細個時都覺得𤷪㗎，𠵱家話我隆胸就話番佢囉，同埋真就係真，唔使俾你摸啩？真嘅質地都唔同啦。」
雷凱欣形容自己的胸脯「鬆泡泡」，但她沒耐性做豐胸運動，一味靠胸圍托起胸部，她說：「我解決唔到呢個問題，試過做掌上壓，但冇力撐唔起個人。我唔敢喺胸度亂搽cream，驚人哋畀咗啲豐胸cream我，萬一升cup咁點呀？惟有戴bra囉，我最鍾意露bra帶㗎啦。」
除被傳隆胸外，有傳雷凱欣亦曾割雙眼皮，她說：「我𠵱家都係黐雙眼皮膠紙咋，但我遲早都會去割雙眼皮，吼大家唔為意就去台灣整，我唔覺得割雙眼皮係整容，我接受到。我割雙眼皮會認，使乜講大話？」
自言遺傳了母親美好身形的雷凱欣，揚言抗拒波霸稱號，她說：「我對呢個名其實係介意㗎，但又冇計。好彩我出街時，成日扮到好似小雲咁，冇人認到我，啲人認個胸多過個樣，我唔會着到好性感出街，所以唔怕撞到啲不懷好意嘅男人。冇乜好驚啫，啲人最多離遠望吓，唔敢掂嘅。」
採訪：朱倬誼
攝影：陳偉權
協力：羅慧敏
部份服裝提供：Charcoal
化妝、髮型：ZitaChan@Touchup
