恒指反彈41點，期指升76點。滙控（005）帶住指數，每變動0.50元，指數升跌18點。滙控收129元，假設已除息（唔係除淨）2.1元，則理論價係126.9元，啱啱係1月份低位（126.5元）左右，現價若能守穩，可當作理論見雙底。滙控除息計，預期PE13.7倍，點算貴？鬼子佬唱淡之笛，咪信到十足。
滙豐C輪4441：滙控周一派成績表，跟住喺英美散咗。周一至周三，滙控在倫敦的成交量依次係1.40億股、0.91億股、0.44億股，高過平日通常嘅0.30億股好多，但3日嘅交投逐級減少，可視作良好訊號，唔接受滙控成績表嘅股民，要賣貨嘅已賣得相當，跟住輪到好「息」之徒為收息而上車。滙控喺美國交投嘅顯示作用較少，當地成交只及英國6%。滙控下周再下周三除息，除息前會有搶息活動，對股價有支撐作用。
滙控C輪可以收啲，如果以前高價出貨逃過一劫嘅話，𠵱家低位補貨，一路補一路笑。如果冇買過嘅話，則要有心理準備，輪價仍然會好波動，贏輸好快。揀對象，始終係4441最靚，計埋股息因素，實際溢價都只係1%（表面負0.6%），有接近4個月去賭，槓桿率30倍，條件正斗。
長實C輪3560：長實（001）過去4日跌4元，跌得重多過滙控（005），都應該有反彈機會。長實C輪博反彈，揀3560，6月中夠鐘，輪價24仙，溢價4.4%，槓桿率29.7倍（有效13.2倍），引伸波幅20.7%，1日成交金額半億元，睇錯方向唔怕走唔甩。
章盛