章小蕙噚日喺有線電視接受吳君如主持嘅《再睇星期五》節目訪問，年前向章小蕙追討二億五千萬嘅裕泰興董事總經理羅守耀，最近嘗試做導演，執導新戲《非常青春期》，咁啱債仔章小蕙亦處女演出《桃色》，但係噚日同章小蕙講開羅守耀𠵱家做緊導演，佢表現到好似唔識對方咁話：「邊個呀？」佢頭腦清醒番之後，先至話自己成日唔喺香港，冇乜留意新聞。
不過，章小蕙話如果羅守耀搵佢拍戲，佢都唔介意。章小蕙講笑咁話：「我揸鞭都得，揸槍應該難唔到我！」
羅守耀噚日亦同馮仁昭講，話唔識章小蕙呢個人，亦唔會考慮搵佢拍戲，難怪羅導演咁勞氣，債仔爭你錢重話唔識你，條氣點會順吖！
王菲同李亞鵬成日被傳婚訊，噚日內地又有網上消息話佢哋飛咗去歐洲結婚，重話經理人陳家瑛同阿菲唱片公司負責人邱王黎寬都有同行。馮仁昭噚日打畀寬姐，佢話：「我𠵱家唔喺歐洲，亦冇收過王菲話要結婚嘅喜訊，我𠵱家開緊會，邊有閒情去歐洲玩？」
曾參選亞姐嘅韓國靚女河少英，噚日嚟香港宣傳亞視播放嘅韓片《茶母》，佢着咗一身韓國服飾去黃大仙為《茶》劇同自己嘅事業求籤問卜。河少英嘅經理人同早前自殺嘅韓星李恩宙相識，對於李恩宙身亡，佢經理人亦大受打擊，並感到好可惜同心痛。
胡兵近日喺香港宣傳，點知俾雜誌影到佢同朋友蒲吧，話佢參加男同志派對，又話佢同男性胸貼胸，玩得好開心。噚日胡兵去新城接受訪問時笑住咁話：「我一年來一次，也被人拍到，真的要買六合彩。」胡兵話佢唔介意成為狗仔隊嘅追蹤目標，但佢話唔知嗰間係同志吧喎！
原子鏸日前應邀擔任「香港專業電影攝影師會2005年春節聯歡晚會」嘅特別嘉賓，香港電影導演會永遠榮譽會長張同祖、吳思遠太太同新任導演會會長許鞍華都係座上客，當晚嘅氣氛相當熱鬧，全場嘅高潮當然係抽獎時間，就連同為抽獎嘉賓之一嘅原子鏸都抽到名貴古典象棋，佢好開心咁話會同媽媽鄭佩佩好好研究一番。
劉浩龍噚日去商台點唱《我的好友》畀同是寂寞人嘅老友聽，佢話：「成班friend唔係有女朋友，就係有個女，得番我同霆鋒係一個人，每逢節日，我哋兩個就會互通電話，好似今個情人節，我哋咪一齊打機度過，呢個都係我好朋友。」
