本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如僱主或僱員有任何疑問，可致電勞工處熱線：27171771查詢，此熱線會由「1823政府熱線」職員接聽。
小強：肥仔成，今晚放工你去唔去老何嗰個榮休晚宴？
肥仔成：去！老何係公司嘅老臣子，由開張做到𠵱家幾十年，我都好唔捨得佢走。其實係唔係老闆要佢退休？
小強：唔係，係佢自己要求退休。唔好睇老何已經就快七十歲，佢嘅工作效率重高過好多後生仔。所以老闆都好想佢繼續做，不過佢話做咗幾十年，係時候休息吓、湊吓孫。
肥仔成：但係佢自己辭職唔做，咪無咗份長期服務金囉！佢做咗幾十年，筆長期服務金都幾襟計！
小強：你唔好知少少扮代表啦！根據《僱傭條例》規定，六十五歲或以上嘅僱員，只要受僱不少於五年，因年老而辭職，都一樣可以有長期服務金！
肥仔成：係喎，但好似重要符合唔知乜嘢嘅合約要求，係唔係？
小強：係「連續性合約」呀，即係個僱員要連續受僱於同一僱主四星期或以上，而每星期最少工作十八小時，就有資格攞！
肥仔成：老何日日朝九晚五，個個星期返足六日，合資格有餘啦！
小強：係呀，所以今晚老闆畀錢搞晚宴，老何就出錢買禮物玩抽獎！
肥仔成：咁今晚我一定有早無遲喇！
以上資料只用作說明《僱傭條例》下的相關條文，對有關法例的詮釋，應以《僱傭條例》原文為依據。如有任何爭議，則以法院的判決為最後依歸。
資料提供：勞工處勞資協商促進科
服務熱線
電話：29908288
傳真：23702192
電郵：