早前榮獲威尼斯電影節「榮譽金獅子獎」嘅日本動畫大師宮崎駿，近排喜事重重，由佢執導、木村拓哉負責配音嘅新作《哈爾移動城堡》，雖然喺日本只係上映咗一百零二日，但入場人數已經衝破一千四百二十二萬人，打破咗佢舊作《幽靈公主》嘅紀錄之餘，重成為日本電影史上入場人數第二位。
負責發行《哈》片嘅日本東寶電影公司噚日公布消息，喺上年十一月二十日於日本上映嘅《哈》片，截至前日入場人數已經超過一千四百二十二萬六千人，票房超過二百億日圓（約十五億港元）。《哈》片亦打破宮崎駿舊作《幽靈公主》上映三百六十四日嘅入場人數紀錄，只係屈居喺入場人數達二千三百五十萬人嘅《千與千尋》之後，令到日本電影史上入場人數嘅三甲位置，全部由宮崎駿一人獨佔，非常厲害。
而今個星期嘅日本票房榜，《哈》片只輸畀荷李活電影《歌聲魅影》，成為本周票房亞軍。而香港嘅宮崎駿fans今個月二十四號嘅復活節檔期開始，就可以欣賞到《哈》片。