阿董真係唔止上神枱，而係引咎辭職（或者挾功升職為國家領導人），真相經已百分之九十九點九大白！
壽爺出招，打到特區嘅低層次劣質政治勢力倒瀉籮蟹！聲稱要會見審查特首候選人嘅民建聯目瞪口呆，講開支持唐唐嘅田少話佢好「愕然」，而一干民主派人物重好笑，竟然同陳鑑林合流，話阿董做得民望幾好，齊齊挽留㖭！
阿董飛咗去北京，無精打采咁話：佢做政協，經過與中央磋商，辭職問題，「適當時候」會公開交代！
凡係了解共產黨嘅都知，交代，即是犯咗罪要坦白嗰隻，正所謂「要老老實實向人民交代」，阿董想幾時講嘢，想講乜嘢，分分鐘自己都揸唔到主意，要由壽爺具體指示，做特首做到咁，形同經已遭受「雙規」，真係情何以堪咯陰功！
中國人社會，人面現實，功利、險惡、一沉百踩，往日力竭聲嘶攬董表忠嘅政治爬蟲類，紛紛同阿董劃清界線！香港人若果想見識吓乜嘢叫人情冷暖，睜大眼睇實未來呢幾日，土共老左、商賈名流，點樣變臉，由過往嘅肉麻擁董，變為反董棄華，改為吹曾攬權喇！
田少覺得愕然，又難怪嘅！佢一向後知後覺，今日重揸住支旗，寫住個「唐」字，但沙塵滾滾，千軍萬馬，紛紛棄唐投曾，最後可能剩得佢一支公攬實支旗！
咁老襯咩田少？學吓人哋賭王八十幾歲頭腦重咁精明吖，快快趣趣掟咗支旗，過底攬實曾司長，嗌口號、拍手掌，加入「舔曾吮權」嘅大軍喇！
特區政治發生大海嘯，地殼板塊大裂變，今個星期，好睇過煙花滙演！全港中學教師，應該把握住呢個千載良機，向學生解說，乜嘢叫做劣質政治，乜嘢叫做獨立思考，乜嘢叫做偽愛國，同埋，點樣做一個有人格嘅人！
（圖）老董噚日頭耷耷咁離開特首辦，乜都冇講。
傳真︰2623-9278
電郵︰