又話阿董可能唔撈消息對市場正面，但噚日大市急跌210點的表現就唔多似啦，相反阿董家族嘅東方海外（316）在公布業績前持續強勢，再升1.75％，收34.90元，創下52周新高，睇落都幾諷刺。
除咗滙控（005）等大藍籌外，噚日好多澳門賭業股表現亦疲弱．連帶今日公布業績的嘉華國際（173）同嘉華建材（027）亦回落得頗急，阿媽跌4.84％，收2.95元，至於阿仔就跌6.28％，收7.45元。
經紀黃話，雖然佢唔知嘉建幾時有賭牌注入，所以唔敢評論呢隻股，但對於阿媽嘉國，佢就覺得不宜睇得太淡，雖然股價波動有如炒股，但間公司內裏紮實，噚日急跌可能係因為上周突然升得太急之故，若然今日公布業績對辦，唔排除可以重拾升軌。
另外，在噚日跌市之中，冷門股益華國際（370）突然開車，升8.28％，收0.17元。經紀陳話，公司即將轉型，由教育轉去做煤炭行業，兼且會改名。呢隻股向來由大陸同胞炒作，局外人好難睇得清楚。
慕容小初