對中國人影響深遠嘅孔子、曾子，佢哋嘅後人原來已經植根香港。日前浸會大學同傳媒聚會，席間曾憲博副校長（才子陶傑外父個細佬）同八方講，佢個名同人大常委曾憲梓好相近，大家真係親戚嚟㗎，重係同輩㖭。
唔止咁，曾副校同科大副校長孔憲鐸，中間嘅「憲」字都有淵源。佢仔細解釋話，原來孔、曾祖先早已訂下規矩，佢哋後人嘅名，中間一個字都選用同一組字，總共有二十八個，例如憲、繁，逐代輪流咁用，所以若果姓孔或姓曾，個名中間同一個字，就係同一輩。
曾副校重好幽默咁話，佢最後一個字係「博」，所以咪做咗學術囉，同曾憲梓差一個字，就係差天共地。其實曾校長又毋須妄自菲薄，曾人大喺香港都唔係好受歡迎啫。講開曾子後人，八方下次真係要問吓校長，煲呔係咪認親認戚，想做特首先去山東祭祖，話自己都係曾子之後。
傳真︰2623-9278
電郵︰