上晝收市恒指勉強挨近萬四，下晝開市即散，埋單唔見210點，主角滙控（005）拋售壓力未消，收128.50元，再跌2元，恒指俾佢拖低72點。老董是否辭職成為城中熱門話題，過一陣就會明朗。以前成日有人講笑咁講如果特首換人，恒指即刻會有若干升幅賀吓，睇吓係真唔係。
恒指C輪：恒指C輪喺跌市中，自然散到七個一皮。兩日計埋，恒指總共唔見344點，當然主要受到滙控拖累。滙控最低見128元，接近1月最低位127.50元，再見低位，若然守得住，個市有機會反彈，到時可以吼些少恒指C輪博反彈，對象係3577。隻輪5月底夠鐘，輪價8.8仙，溢價0.6%，槓桿率25.8倍（有效16.2倍），引伸波幅14.4%。
3577係熱門恒指C輪，3505亦係，大家同日到期。比拼之下，3577抵買過3505。
中企P輪：國企指數散3%，中企指數C輪好唔掂，P輪自然生猛。油股位高勢危（短期），中石化（386）配股，暫時都好難升番，國指繼續睇淡，吼間中反彈時，低位買中企指數P輪。3580算係較大成交嘅對象，5月到期，輪價10.1仙，溢價3.8%，槓桿率12.3倍（有效8.2倍），引伸波幅23.7%。3785交投更大，但溢價逾12%，諗唔過。
國壽P輪：國壽（2628）跌0.20元，收5.25元。國內保險股揸唔少國內股票，去年底國內指數較6月底更低，保險股揸股票未兌現虧損要計埋，見高位可以趁低買P輪。
國壽P輪對象係3706，6月到期，輪價38.5仙，溢價4.5%，槓桿率13.6倍（有效7.6倍），引伸波幅25.8%。
章盛