正如譚詠麟所說：人有三衰六旺，最近行內盛傳水貨大亨袁仁祥面對生意難關；正受命運之神考驗的祥哥，身形顯得比平日消瘦。據袁仁祥身邊的人說，祥哥最近總是眉頭深鎖，就算在裏原宿的街頭上碰見行家也沒有打招呼，獨個兒低頭沉思，性格突然從囂張變得孤僻，惹人關注。行家話：「聽講話上年年尾開始，全靠香港啲潮流雜誌煲番起APE，嗰啲鯊魚頭衞衣被人搶到成萬蚊一件，十足97時樓巿咁誇張，你知喇，祥哥不嬲睇淡APE，以前好搵時份人難免招積，本來搵開日本仔代勞排隊買APE，可能因為傾唔掂帳，後來同日本幾個拆家反面，入APE就靠祥哥自己同幾個留學生親自排隊。
APE掂番自然多咗人排隊搵食，祥哥斷咗同日本拆家嘅合作，幾個留學生唔係轉投第二個水貨商門下就畢業冇做，祥哥咪變咗孤軍作戰囉！最慘係𠵱家BusyWorkshop每個禮拜逢星期三同六推出限量Item，你叫佢點就時間留喺當地？唔通留成個星期喺日本咩？其他行家就靠當地有勢力人士代排隊，最近祥哥好多正貨都入唔到，例如成批APE拉鏈迷彩ZipUp衞衣，明顯地輸咗！所以佢正積極部署反擊，變得沉默寡言都算係再出擊前嘅第一步囉！」
主持人：大食Jack
八卦熱報：[email protected]