老董噚日笑笑口上京，話好高興做番政協委員喎。梗係要話開心啦，唔通話俾中央迫走咩。八方聽聞，老董升上神枱呢套京劇由我哋偉大嘅國家副主席曾慶紅親自執導，老董自願也好，非自願也好，劇本已經寫好，等緊男主角出場。
呢場「老董罷官」認真震撼，五十萬人上街老董走不了，反而佢後台老闆老江一走，胡總當眾面斥，令到老董顏面無存，結果要同佢班舊夥計葉劉、阿松同埋小強一樣，急流勇退。
中方消息咬死唔係中央對老董不仁，只係佢不義，做到一半劈炮唔撈，究竟誰是誰非，八方𠵱家都分唔清。總之最後版本一定係老董自己要走，中央挽留不得，只好畀個政協副主席嘅大花瓶位佢做。可以同恩人霍英東平起平坐，都算執到，至於個爛攤子，就等曾慶紅同佢收拾啦。
傳真︰2623-9278
電郵︰