立法會噚日冇特別議題，原本有望趕喺《大長今》開始前收檔，但輪到張宇人（圖）動議佢關於兩電利潤管制嘅修正案時，佢老兄竟然唔喺立法會議事室，搞到個會斷咗纜冇得投票，范太被迫要宣布暫時休會。范太話：「我哋都想早啲收工，但張宇人議員唔喺度，我哋都要搵佢返嚟。」
八方即時問馬版同事，係咪張議員去咗拉頭馬？佢哋話冇呢回事，佢隻馬噚晚都冇得跑。果然過咗兩、三分鐘肥仔張就返入嚟。張宇人解釋話，佢隻腳患咗筋膜炎，頭先走咗去打針，走動有啲唔方便，所以唔喺度，真係唔好意思。頭先八方走嗰陣，都見到佢撐住把遮嚟行。話時話，呢個醫生真係唔話得，咁夜重幫張宇人打針。
傳真︰2623-9278
電郵︰