昨日各大報章均報道董建華將辭去特首職務，眾藝人對事件亦十分關注，其中杜汶澤、黃秋生和張堅庭都表現得十分雀躍，直指董建華辭職是好事。至於曾在「左麟右李」演唱會上扮「懵太」的梁榮忠，更指今次事件是《殘酷一叮》政治版。不過身為全國政協委員的阿姐汪明荃認為董建華不必在任期即將屆滿前下台，她昨日赴京出席全國政協會議時，勸董建華應好頭好尾，做到卸任為止。 採訪：張止寒、比華利、陳月媚
汪明荃：佢冇必要下台，香港最差嘅時候都過咗去，唔會再衰落去，董特首可以做到卸任為止，好頭好尾，反正就嚟都有第三屆特首，佢對香港嘅貢獻就係做咗特首嘅工作。
梁榮忠：呢個係《殘酷一叮》政治版，睇佢可以叮去邊囉！我相信呢個世界可以有任何聲音，無論佢係留港抑或係叮去內地，總之係為中國人出力，去邊都冇問題。
黃秋生：佢辭職咪好咯，提早放假，佢有成年假吖嘛。啲樓巿又會升囉，起碼升幾個月，可惜我冇買，但都要開支酒慶祝吓，雖然惡劣嘅情況未必已經過去，但點都係一個好消息，佢做咗咁耐應該休息吓，幫我恭喜佢呀，以後唔使俾人鬧，以前大家乜嘢都可以賴佢，遲啲冇得賴都好，睇吓真係香港人唔掂抑或係乜嘢。我自己就覺得曾蔭權最適合做特首個位。
杜汶澤：日本仔當年統治咗香港三年零八個月，董建華都管咗七年半，夠皮啦！𠵱家大熱特首人選係曾蔭權，亦係大家嘅民意所向，佢嘅成份好，有政界劉德華嘅本錢，注重打扮儀表，而且出身寒微，靠苦幹成功，呢啲特質香港人最欣賞，相比起另一熱門唐英年，會比較容易受香港人歡迎，正所謂行運醫生醫病尾，香港經濟好咗咁多，一個咁容易取得民心嘅領導人，相信中央亦流口水嘅，不過我只係升斗市民，同香港七百萬人一樣，係冇得選擇嘅，只不過覺得曾蔭權比較適合啫。
吳君如：一路都好恨佢走，希望快啲換人，但係今日睇到報紙話佢落台，反而覺得有啲心噏，有啲唔捨得，有人覺得佢做特首係折磨大家，但係佢又唔係表現到咁差，亦有人話係中方插手鋪排，驚香港人冇話事權，其實凡事都有兩面睇，有好亦有唔好。新任特首梗係煲呔曾（曾蔭權）好，佢係公務員，由細做到大，佢做好恰當，而且佢握手握咗咁耐，不過，呢個係好陰謀論嘅。
張同祖：如果董建華真係請辭，佢都走咯，我唔想批評佢嘅政績，我希望新一屆特首會聽多啲民意，了解香港嘅實況，咁先幫到香港人，過去董建華對香港電影工業好支持，相信佢搞嘅香港影視娛樂博覽會受到影響。
張堅庭：董建華嘅表現係戲劇培訓嘅悲劇，佢完全冇表演觀念，冇說話技巧，冇眼神接觸，就算對住電視講嘢都冇表情。印象最深係董特首同溫家寶前年去淘大探訪沙士重災區，二人對比，溫家寶就好親民。其實如果董特首一早肯同巿民密切溝通，就唔會有今日嘅結果。所以中央千祈咪留佢，佢下台香港會冇咗呢個思想包袱，自我形象會提高。我覺得曾陰權接任係最佳人選，但佢上台一定要戒心高氣傲。
