老董忽然喺經濟復甦時引退，全世界都跌爛晒啲眼鏡。八方喺立法會見到白鴿黨前主席李柱銘（圖），佢都係覺得好難明白，佢始終唔信老董係自願走嘅，因為上個星期中，老董重興致勃勃同人講佢啲施政大計，所以真係十萬個為甚麼要郁佢。
馬丁唔明，連親中嘅工聯會都唔明，鄺志堅話佢哋年初十見阿董嘅時候，佢重鬼咁認真聽意見，一啲都唔似想劈炮。而如果話佢身體有毛病，佢位御醫林兆鑫年初七就同八方講，老董身體唔知幾弗，重講笑話佢有排唔死得。
所以話，老董今次走，中央有排解畫，而煲呔噚日神采飛揚，張文光重喺立會休息室大聲叫佢做「曾特首」，民主派公開話唔想老董走，但係就開心到好似開Party一樣，班親中人士簡直冇眼睇。
傳真︰2623-9278
電郵︰