歐洲國家盃神射手巴路士最近扭計，威脅利物浦領隊賓尼迪斯喺今季餘下時間畀佢踢多啲正選，否則季尾就諗轉會喎。
導火線就係聯賽盃決賽，賓尼迪斯決定以摩連迪斯夥拍傷癒復出嘅基維爾攻堅，都唔用佢打正選！巴路士重話見到奧雲過檔皇馬，施斯又斷腳有排休息，就諗住自己個正選位應該幾穩陣啦，點知到𠵱家都重係要喺後備席上等出場機會，所以就覺得自己不受到球會重視。
你有你嘅道理，但我求大俠覺得賓尼迪斯唔畀你打正選亦都有理由；每次我求大俠買親利物浦贏波，睇住你喺場上面死扭爛扭獨食到死唔肯交波，白白錯失唔少入球良機，都想你老哥即刻被換走㗎！睇清楚自己衰咩先，總好過一味話人哋。
丘仔當紅唔跟就笨
想唔想知點解本報客席名家丘建威，近期喺足智四人幫贏到開巷呢？經我求大俠明查暗訪，丘仔終於承認好事近，喺今年五月廿六日，同拍咗拖七年嘅女友Carol拉埋天窗，正所謂人逢喜事精神爽，有追開足智四人幫嘅讀者，呢幾個月記緊要追捧大紅人丘仔嘅貼士啦！
小心羅馬里奧老馬有火
羅馬里奧日前入選巴西沙灘足球代表隊，備戰五月嘅沙足世界盃。東道主巴西代表隊教練費利拿講明召用羅馬里奧，係為咗提升賽事嘅號召力。我求大俠同意羅馬里奧參賽可以令賽事生色不少，但佢始終係大排球星，成日同人發生摩擦，希望到時唔會影響巴西奪標機會啦。
望愛華頓善有善報
效力英乙劍橋聯嘅十八歲門將魯迪已同愛華頓簽約四年，會喺五月正式加盟；呢單轉會消息聽落無乜特別，但原來除咗轉會費，愛華頓重會喺今夏作客劍橋聯踢場友賽，保守估計劍橋聯夾埋可執成五十萬鎊，從而解決財困問題。愛華頓咁好人好事，希望佢哋可以踢到下屆歐冠盃啦！
郝董球衣有出路
雖然喺前日錫菲聯對阿仙奴場足總盃重賽冇得踢，但郝海東喺當地華人社會已引起頗「大」嘅轟動，件錫菲聯「39」號波衫喺佢未露面之前已賣咗七、八件。賽後郝董重同班捧場嘅愛國球迷簽名合照，呢啲球員與球迷打成一片嘅場面真係喺外國先至見到啫。