將軍澳樓市受同區兩大新盤，君傲灣與將軍澳豪庭就快開賣刺激，成交大增，世紀21鄺志輝話，呢排公司每日都促成約十宗二手買賣。
蘭西睇番佢哋嘅成交資料，發現居屋自由市場價錢，竟然貼近部份私樓，好似廣明苑，B座中層三室，八百零三呎，成交價一百七十六萬，每呎二千二；而安寧花園，六座高層C重勁，五百一十呎，逾百一萬易手，每呎二千二百四十五。
至於私樓富麗花園，一座低層H，五百六十呎，賣百三萬，每呎二千三；慧安園三座中層A，五百七十呎，易手價一百三十五萬，每呎唔使二千四。
究竟係居屋自由市場價太貴，抑或私樓價太平呢？鄺志輝解釋，呢兩個居屋單位，因為連裝修賣，所以呎價高啲，市價應該係千九至二千。呢啲連裝修單位，係投資者早前低價購入，用八萬至十三萬翻新，然後轉手，每呎賺六百零。
佢補充話，近排幾多呢類成交，好似康盛花園咁，一個禮拜就有三單。
地鐵○二年開始，陸續喺商場推行「全面優質顧客服務計劃」，透過培訓及獎勵商戶員工，提高佢哋嘅競爭力。
地鐵四場，共五百幾租戶，分七個範疇，評核表現，包括員工儀容、顧客入門招呼語、對顧客需求嘅掌握與應對、對產品及服務熟悉程度、處理異議能力、顧客付款或道別顧客時用語、同埋店舖環境等，選出十五個最佳租戶，共送逾百萬元獎金。
結果，StarbucksCoffee蟬聯本年度飲食業最高分商戶，而FanclHouse就喺零售業得最高分，兩商戶同時攞到兩個獎。其餘得獎商戶，銀行有滙豐同恒生銀行、珠寶店有周生生同謝瑞麟、而食肆有肯德基同意粉屋等。
大陸𠵱家簡直係塊超級大磁石，愈嚟愈多外國人，無論工作或個人喜好，長駐內地。有唔少外國客嘅高力國際，噚日搞講座，講香港、北京同上海三地豪宅租務市道。
高力Anton話，原來喺大陸租樓，就算北京同上海呢啲一線大城市，由於租務市場發展冇耐，業主又嚟自唔同背景，好多時租金叫價同成交水平，都冇邏輯可言，租約條款會包乜唔包乜，業主可能未必講得清。
另外，好似北京，租客好鍾意嘅四合院，原來入住後分分鐘發現好多問題，例如隨時冇水電。
至於香港，高力盧永輝話，豪宅一直供不應求，就算勾地表再加多啲豪宅地皮都唔夠。喺𠵱家嘅升市，賣價升幅會繼續大過租金，因此，未來兩者差距會愈嚟愈闊。
新地買咗鴨脷洲油庫地，申請改用途事件，雖然最近淡咗落嚟，但就政府以私人協約方式批出土地，內裏究竟有冇利益輸送問題，就繼續被立法會議員窮追猛打。
噚日房屋及規劃地政局局長孫明揚，就呢個問題答覆劉慧卿。佢話，過去三年，政府冇引用過土地停用條款，去收番任何呢類批地，雖然期內接到兩宗呢類改用途申請，但都被否決。
就算接受佢哋申請，根據程序，政府都會就土地嘅原有價值同改用途後嘅公開市值，向土地持有人收番中間差額（即補地價），唔會徇私。
電郵地址：
