生三個，生生不息，改名可以考慮「三字經」。
鍾意數目字的，「三六九」無窮無盡最合心水，勝在筆劃不多，好寫好記。嫌「三六九」普通得滯，叫三個仔女做「二穿七」，經常有贏錢一條龍的希望，也不錯嘛。無人叫兒女做阿穿嗎？即是說，全世界得你一個，不怕撞名，獨一無二，重想點。
如果生三個的是麻將發燒友，乾脆落實叫三個仔女做「中發白」、「南北和」、「大四喜」或者「雙番東」。「大相公」注定無啖好食，就要避忌點。而且叫個仔做甚麼公的，跟曾公、孫公難免頂撞，食長糧實無望。
香港人愛好英文名字，很多父母未替子女改名前已經諗定英文名，生三個，當然不會馬馬虎虎叫做「ＡＢＣ」或者「ＸＹＺ」。比較食正潮流的英文名字，是「version123」。外國就有這樣省事的老竇。影后愛瑪湯遜添丁初期，也叫自己的寶貝女兒做「baby.com」。不過三個都爭住做「version1」，實打崩頭。再講，香港地，難保沒有盜版。一向鍾意老翻的老竇老母，要費點腦汁了。
愛國人士順理成章為三個子女起名叫做「大紫荊」。立心親近權力核心的愛國商人，借生仔交心，叫三胎做「人大代」，夠晒凸顯高尚情操。叫「特首辦」太沒出息，不如叫「七十一」。
提倡生三個的曾司長，自己最好做扶蟲委員會會長，先搞定三胎再說。名字不難度好，叫做「曾家產」、「曾得遠」和「曾減D」（中英結合，比自選車牌更有創意）。再生下去，就叫「曾尾數」、「曾上位」、「曾啖氣」。