馮仁昭四圍超：
陳冠希吹雞著草當歌仔電台拒播

陳冠希（Edison）喺一月底推出嘅大碟《Hazy：The144HourProject》，幾受樂評人同電台DJ嘅歡迎，繼《BlueSkies》之後，本來第三首派台歌係《老友記》，點知有電台覺得首歌嘅歌詞粗鄙，例如有「吹雞」、「着草」同「你露媚」等字眼，電台為怕踩界，向唱片公司反映話唔播得首歌，惟有改《PartyLikeWeDo》做第三首派台歌。

袋七位數字酬金
馮仁昭發現重有樣嘢好好笑，係人都知Edison鍾意拍住MC仁同陳煥仁做音樂，行rap歌路線，好多時都要MC仁幫手rap一段，佢有幾首歌，包括《老友記》，都註明主唱係陳冠希，然後括住「Featuring：MC仁/CHEF/EricKwok」，Edison唔知係學咗許志安，定係故意開安仔玩笑呢？
另外，Edison最近應台灣Levi's邀請擔任廣告代言人，酬勞達七位數字，佢都幾滿意。早幾日Levi's特別搵咗新加坡出身嘅攝影師LeslieKee為Edison拍咗一輯充滿活力嘅相，Edison話：「我係Levi's嘅忠實擁躉，同佢合作實在令我有好大滿足感。」

阿佘智霖情侶Look𢱑銀
佘詩曼同張智霖呢對螢幕情侶，最近獲蒙娜麗莎婚紗公司邀請做今年嘅代言人，佢哋着住禮服，以公主同王子嘅造型出現，十分登對。阿佘為咗以最佳狀態影呢輯相，事前特別節食同做瑜伽。阿佘同張智霖拍檔多次，佢哋面對鏡頭都好有默契。

孫佳君嫁咗富商生埋仔
自從羅兆輝大爆性史後，孫佳君就好少出嚟見人，原來佢已經結咗婚生埋仔，有傳媒影到佢𠵱家住喺壽山村道一間巿值四千萬嘅獨立屋，老公係一間公司嘅董事，揸架市值一百三十萬嘅跑車，相信家底都好豐厚吓。孫佳君直認結婚兼生仔，重話以後唔會出嚟拍戲。

家英哥唔休息陪阿姐
正為肝癌療養嘅羅家英，噚日抽空陪阿姐汪明荃去內地辦理來往中港嘅車牌手續。噚日阿姐揸住掛有內地車牌嘅平治四驅車，到廣播道寓所接家英哥。非常體貼嘅阿姐就揸得好小心。及後記者打畀家英哥，問佢點解唔爭取時間休息？家英哥話：「成日坐喺度，間唔中都要郁吓！」

沙麗閉關練歌應戰
葉蒨文（沙麗）噚日去商台做訪問，佢最近忙於準備同香港管弦樂團合作嘅演唱會，沙麗話：「不過我𠵱家都未同佢哋綵排過，我有要求過，但可能佢哋唔會咁早綵排，我𠵱家都係喺屋企練咋。」沙麗又話今次嘅演唱會係佢喺樂壇以嚟最大嘅挑戰。