無綫新劇《胭脂水粉》的演員黎姿、陳豪、蒙嘉慧和曹敏莉等，昨日齊到馬鞍山郊外拍攝一場墳場戲，昨日天氣寒冷，氣溫只得攝氏八點五度，一班演員不用埋位時，便立即像企鵝般圍在一起取暖，陳豪更攬實劇中飾演其弟的梁烈唯。
黎姿和曹敏莉昨日都做足禦寒準備，黎姿說：「我入面着咗三層絲襪衫，外面再加三件冷衫，重有暖包，如果唔係都頂唔順。」曹敏莉更索性穿上牛仔褲打底，她說：「我已經有少少傷風，着多少少穩陣啲。」
而問到陳豪為何不替其他女士擋風時，他說：「唔係咁好，費事誤會。」對於有報道指他與緋聞女友廖碧兒戴上卡地亞情侶戒指一事，陳豪昨極力否認，他說：「唔係，我都唔知同款，我自己就有隻卡地亞戒指，本雜誌成日亂寫。」
採訪、攝影：楊潔雯