「十年樹木，百年樹人」呢句說話最啱用嚟形容剛剛喺上星期三元宵佳節，度過佢一百歲壽辰嘅國際權威植物學家胡秀英教授。𠵱家喺中大擔任中醫學榮譽講座教授嘅胡教授，噚日出席中大特別為佢搞嘅「胡秀英教授百齡嘏壽榮慶學術研討會」，八方都有去同胡教授賀壽。
雖然胡教授已經百歲高齡，但仍然中氣十足，吹完蠟燭之後，又同在場三百幾個嘉賓分享佢嘅一生。清朝出世嘅胡教授憶述番當初點解會揀植物學嚟讀，係因為佢細個嗰陣病得好嚴重，佢爸爸即刻去買藥畀佢食，最終救得番，所以大個咗希望知道係邊隻中草藥救番佢一命，於是就走去讀中醫同植物學。
之後胡教授又同一班記者閒話家常，分享養生之道。佢話每朝都會飲一隻由茶葉、菊花、玫瑰花、靈芝、西洋蔘同紅花沖泡嘅茶，飲咗成二十年，佢重叫隻茶做健康茶㖭。難怪胡教授仍然思路敏捷，每日都花十二個鐘做研究，聽聞佢重會出三本關於香港蘭花、菊花同香港花園嘅書㖭，真係唔到八方唔服！
（圖）植物學國際權威胡秀英教授（右）慶祝一百歲壽辰，中大特別為佢搞咗個研討會，劉遵義校長（左三）梗有到賀啦。
陳亮華攝
傳真︰2623-9278
電郵︰