自稱青樓妓女嘅張永霖又同港台開咪，逢星期日下晝四至五，節目名叫做「張永霖的世界」，佢話唔係不甘寂寞，而係真係放唔低香港人。佢噚日見記者，口口聲聲都話有錢人好識得照顧自己，係窮苦大眾令佢好擔心，想同佢哋分享吓生活同經驗。
張永霖從電盈退下嚟，做咗港大專業進修學院董事局主席，佢話香港人大部份嘅錢都賺來不易，所以最緊要係保護住自己啲錢，千祈唔好想不勞而獲，投資致富，佢話佢自己嘅財富都係積蓄番嚟。佢嘅心得係「愈少錢要愈保守」，最好買人民幣三年債券，因為有成3.75厘息。
張永霖今次一個人做節目，佢話可以感性啲，對象係中年人，又點歌又講嘢。佢話自己都有過唔開心嘅時候，好似七○年第一次被女友飛，佢傷心咗成年，日日一個人跑步食飯；另一次就係有個好朋友自殺死，兩件事都影響佢一生，做人更堅強，亦明白平安是福。至於佢嘅婚姻就唔想多講，只係話男女真係有別，太太如果唔識易地而處，冇諗對方嘅感受，就好易觸礁。
傳真︰2623-9278
電郵︰