老董即將升上政協副主席神枱位，四方八面消息都話佢亡無日矣，即將下台，快則一個星期，慢則等大會結束後。
老董今次明升暗降，有人已經舉出當年葉選平（圖）為例，認為係一次翻版。話說祖籍客家嘅葉公當年係廣東省省長，由於深得民心，加上乃父葉劍英當年剿四人幫建大功，連老鄧都讓佢三分。不過唔知係咪佢功高震主，令新領導老江不安，於是喺九一年三月舉行嘅全國政協七屆四次會議，先增補佢做政協，然後再選佢做副主席，等佢冇得南返。
之後冇耐葉公就淡出廣東，然後喺五月正式辭省長職，由朱森林接手做副省長代省長至翌年新省長選出。
老董當然唔可以同葉選平比，因為一個係功高，一個係過大，但係卻有共同之處，就係身不由己。八方記得當年問葉公點解唔留喺廣東？佢只係好淡然咁答，黨認為佢做副主席好啲，咪聽黨安排。八方諗起都有啲不寒而慄，老董今次上京，真係請君入甕啦。
傳真︰2623-9278
電郵︰