立體動作格鬥遊戲，一個看似很專業的名詞，但其實代表作只有兩大遊戲系列，一是SEGA的《VIRTUAFIGHTER》，一是NAMCO的《鐵拳》。適逢今年是《鐵拳》系列的10周年紀念，廠方決定火速將《鐵拳5》街機版移植至PS2上，而且更收錄一至三集版本，總共4集《鐵拳》，再加埋過關式動作Game玩法，換句話說即是一次過滿足你5個願望，真係打到你儍！
文：魚生（《GAMEWATCH!!》主編）
雖然街機新作《鐵拳5》只推出了2個多月，但可能是因為《鐵拳》在日本的受歡迎程度不及世嘉嘅《VIRTUAFIGHTER》，所以在上年11月才推出的街機版《鐵拳5》，竟火速推出PS2移植版，行貨英文版更喺今日發售。要注意係英文版只係採用英文介面，非美版Game，故毋須改機都玩到。至於喜歡日文介面嘅朋友就要等一等，到3月31日才有行貨返。
人物眾多花樣百出
與平面格鬥遊戲不同，立體格鬥遊戲比較易學難精，因為即使是初學者胡亂按鍵，都可能使出簡單的連續技，所以遊戲的技巧就落在攻擊距離的控制上。簡單來說，遊戲操控只有十字掣、左拳、右拳、左踢、右踢等數個按鍵，利用簡單的操作，控制超過30名角色，使用包括暗殺術（Nina）、跆拳道（花郎）、摔角（King）、中國拳法（馮威）等世界各地的不同格鬥技進行遊戲，加上《鐵拳》系列出名嘅人多勢眾，花樣百出，要練熟各人及其專用10HitCombo都唔係咁易。
新模式變動作Game
唔玩江湖規矩「隻揪隻」，不妨試吓街機版冇嘅「鐵拳ADV」模式，可說是家用版《鐵拳5》的主菜，因為其玩法是以過關為目標的動作遊戲，消滅版圖內的所有敵人是唯一目的，而玩者可控制着主角風間仁，利用對戰模式中的所有格鬥招式戰鬥，破壞版圖內的雜物，探索秘密的出入口等，體驗以一敵眾的全新玩法，可算係之前隻《DeathByDegrees》嘅「風間仁」版！
另外廠方偏好嘅「打住機等讀碟」依然健在，喺讀碟時畫面會自動進入迷你遊戲，那是一款在1991年推出的街機作品，玩者駕駛着太空戰鬥機在立體的世界內戰鬥，雖然當時的機能所限，遊戲畫面依然很爛，不過點都好過齋等讀碟咁悶喇。
打生打死為買衫
街機版對應IC卡，與人對戰時可以贏得段位稱號及新增服飾，育成出獨特的角色。來到PS2版當然亦保留遊戲特色，只要在「街機模式」或「鐵拳ADV」等模式中進行遊戲，玩者都可獲得名為「FightMoney」的金錢，用來購買角色的服飾；至於段位稱號方面，同樣在街機模式中，當玩者達成特定條件時，擁有段位的電腦角色便會出現，只要擊倒這些名為「GhostCharacter」的敵人，玩者的段位隨即改變，再將這些段位及角色造型記錄在SAVE卡之上，便可用有個人特色嘅人物，跟朋友們VS對戰了。
3款舊作超值收錄
除咗最新街機移植版《鐵拳5》及新玩法「鐵拳ADV」外，遊戲內重賣大包，附送同系列嘅三款舊作，包括《鐵拳》、《鐵拳2VER.B》及《鐵拳3》等，全部均收錄在「ARCADEHISTORYMODE」之內。作為10周年的紀念遊戲，玩者可藉此更了解系列的進化，由10年前又醜又爛的多邊形人，進化至今天的華麗畫面，你會驚嘆3D技術嘅進步！而另一個收錄舊作的原因，當然是希望玩家重溫故事，雖然格鬥遊戲所謂的故事，來來去去都離不開一班英雄（儍佬？）修行，以及秘密格鬥大會，不過對眾多人物嘅《鐵拳》系列嚟講，的確可更深入了解呢。
售賣點：
SonyStyle
查詢電話：28335129