阿婆同你講古仔石硤尾觀半世紀香港公屋

石硤尾邨的獨居公公婆婆都愛說故事，一百個獨居老人就有一百個老故事。小記要譚婆婆說故事，譚婆婆一講就是她的青春20歲，路過周伯忍不住：「佢講到今晚都未住到入嚟（石硤尾公屋）呀！不如我講先啦！」走過路過的老人家邊聽邊加入戰圈，講起當年每天比同行多賺$1的威水史，瞓街吹風的淒酸史，跟老伴山頭追蛇的驚險回憶，就邊笑邊拍小記的膝。興奮時像個小孩般手舞足蹈，或者圍起來笑你未出世。沒落的石硤尾邨，只要你願意聽，那被遺忘的老香港生活點滴，比書中、電影中更有生命力。

記者：陳慧敏　攝影：黃子偉

香港首批公共屋邨石硤尾邨正計劃於06年年頭清拆，現存1,200多戶（當中四成是老人家）搬到新建的石硤尾邨。鄰舍輔導會跟深水埗區議會，特意在石硤尾設立了一個「石硤尾人文館」，將石硤尾邨50年來的轉變，通過6個單位重現眼前。大部份「文物」、舊照片都由石硤尾老街坊借出，連嚮導都由街坊充當，隨便拎起件物件都能牽出充滿人情味的老故事。

哈哈笑婆婆　木屋區與蛇同眠

譚好婆婆今年97歲，由木屋區時代就住在石硤尾：「當時木屋仔後面，隔條山坑就種晒啲番薯，我同老公幫人做泥工，有次見到有條水管咁粗嘅蛇，我咪追上去打佢囉！夜晚我哋瞓地下㗎咋，唔打死佢佢咪過嚟咬死我哋囉！好淒涼㗎！」和平之後租木屋仔住，租金$35至$60一個月，為了省錢，他們8毫子一包麥皮吃足一個月。所以火災後可入住月租$14、120呎住3伙人的石硤尾公屋，就叫做「好好喇！」最記得當時日日要輪公廁、輪街喉：「已經好好囉！未起公屋又未有井之前，我哋要走幾里路托水返來！二百幾斤水走一轉，收$3，我已經比其他人賺多$1，好淒涼㗎！哈哈哈！」

留守至最後一刻

舊屋邨沒有升降機，譚婆婆每日仍要上落樓梯，雖然新屋邨設施大大改善，卻說：「唔想住得太高，有𨋢都唔想。」而且千多元的租金，也成為交開$400租金的老人家的負擔。大家又捨不得每天到鄰里家打麻雀，或者坐在家門口打牙骱的生活，打算留守到最後才搬走。

■譚婆婆一邊講，隔籬鄰舍自動埋位，有人講潮州話，譚婆婆輕聲跟小記講：「同佢傾咗咁多年偈都唔明㗎！照傾囉！哈哈哈！」

西裝筆挺周伯伯

大部份後生仔已搬離屋邨，剩下的都是一班老街坊，65歲着到西裝筆挺、趕住過鄰座屋邨會雀友的周玉堂，67年跟太太住在22座，後來22座改建，又搬來18座，環境依舊迫夾。周伯伯：「90呎屋住9個人㗎啦！啲地矜貴過𠵱家呀！𠵱家17、18座啲街坊，我全部都熟晒咯！」

■問周伯伯後生時做盛行？他自傲的拈起西裝一角：「Tailor！香港歷代港督啲衫，重有孫明揚啲衫都係我做㗎！」

外籍人士受感動

訪問當天遇着MrsLizRobinson來訪，周太拚命用國語講解，MrsRobinson聽不明白，但仍感受到周太的熱情，感動得很。
LizRobinson：「想像到當時的生活環境一定好嘈、好惡劣，直到今日只剩一個人居住，每一個部份都好有趣，我覺得大家應該要知道這個歷史。」

石硤尾公屋誕生時

1953年石硤尾木屋區大火，5萬2千人一夜間無家可歸。54年，港英政府於災區，興建了8幢樓高7層的H型大廈安置居民。大廈內沒有電梯，公用浴室及洗手間多半設於走廊盡頭，擠迫的房屋，飯廳書房工作間合而為一的多功能木板床是為首代公共屋邨的典範。

縮骨功50-60年代

導遊潘婆婆，帶我們走進50年代公屋，懷疑當代人曉縮骨功。120呎房仔最少住3戶18口居民。眼見房裏只得三張兩呎半寬碌架床，天花板還加建了張吊床，門後還收了幾個3呎高大水桶，預備當時制水之用。爐頭前牆上掛了個已用到凹凹凸凸的臉盆：「呢，我哋嗰陣用面盆煮飯㗎咋！買個煲好貴呀！」數盡只能安置14個居民，還有4個收去邊？周婆婆好醒的指出門外：「重有條走廊嘛！啲人放工就會攞塊木板、竹蓆，或者開張帆布床出走廊霸位瞓，啲細路仔又瞓逼啲，咁咪得囉！」居民家當不多，一人一個大木箱收在床底或床尾：「我哋嗰陣啲衫掛滿晒喺幅牆度㗎！邊有𠵱家你睇到咁整齊呀！」

■略胖的潘婆婆坐在「大廳」中央，幾乎塞爆間房，甚麼都看不到了！

■房內發現簡單廚房一個，實質係：「邊有位吖！當時個個都喺走廊煮飯㗎咋！」

穿膠花70年代

粵語長片取景年代，70年代房屋政策得到改善，120呎的小房間用薄木板分成兩戶，一邊住一家三口，另一邊可能住上一家八口，但空間已經比之前闊落好多，周婆婆：「當時都冇話嘈唔嘈囉！個個都係咁打開門嚟住，一家人咁都好開心㗎！」家庭工業活躍，好多家庭都會取膠花、穿珠仔、縫布碎等工作回家幫補家計，家裏擁有一部衣車威過今日有架寶馬，居民也愛用膠花粉飾家居。