昨日打開報紙，見紐約滙控（005）咁嘅價，人人都知港股會點。恒指埋單跌134點，滙控跌3元，佔咗跌幅108點，即係其他32隻成份股共跌26點，好和平。
滙控下個再下個禮拜三除息（唔係除淨。除淨係指有其他嘢送，派齋息只能叫做除息，英文1個叫做Ex.Div.，1個叫做Ex.All），2.1港元股息代表恒指76點。昨日3月期指低水103點，計埋滙控除息因素，實在只係低水27點，唔使咁驚慄喎。
中移動C輪4557：中移動（941）高低波幅0.55元，收25.25元中間位，跌0.20元，喺25元邊邊，諗吓C輪博反彈。
熱門對象係4557，明年2月初夠鐘，輪價17.8仙，溢價11.5%，槓桿率14.2倍（有效6.7倍），引伸波幅23%，壽命長，對正股反應唔太敏感。想反應敏感，揀3599，7月初到期，輪價13仙，溢價4.5%，槓桿率19.4倍（有效10.4倍），引伸波幅21.8%。所謂反應敏感，係話贏得好快輸得亦好快。
和黃C輪3561：和黃（013）近期硬淨，昨日只微跌1格。滙控成績表消化後，大市轉穩，和黃有望逐級升，收集C輪等收錢，對象不離3561。壽命長過3561少少嘅3808，昨升1仙，3561則跌1.5仙，3561抵買過3808。兩隻輪大成交，都係炒家炒上炒落，呢頭種樹嗰頭鋸板嘅對象。
滙控C輪：滙控04年派完成績表，昨早出版嘅報紙，行情表有啲趕得切用最新每股盈利計PE，有啲趕唔切。04年數據已成往績，PE15.4倍，除息後以05年「科卡士」計，跌到14倍以下，唔算貴。啱啱派完成績表，暫時都有沽壓，遲吓等平啲，再揀C輪買。
章盛