傳統零售區舖位，租金售價雙雙升到「天價」水平，買賣熱潮開始擴散至外圍地區，北角係今期焦點，蘭西剛剛報道過，大鴻輝以八千六百萬，賣咗北角彩福海鮮酒家舖位，同區另一個舖位，業主即趁勢放售，心目中價錢要五千萬，每呎三千七百蚊。
中原陳耀明話，個舖係英皇道三九○至三九四號，亞洲大廈部份地下、一樓同二樓，地舖六百呎，樓上共一萬二千八百呎。截標日期為本月三十號。
個舖最特別係附連長期租約，由「客家人飯莊」以每月二十萬零五百蚊，承租至○九年十月，而生約部份重可以延至二○一二年。以業主意向價錢計算，租金回報率有四厘八，都有吸引力。呢類鐵約舖位，較為少見有人放售。
聽講，業主一月用四千一百五十萬買入，若果成功賣出，可以賺成八百五十萬，換句話，短短幾個禮拜，件貨升值兩成。
上個月二手成交非常暢旺，美記潘皜民話，元朗錦綉花園有六十宗成交，創九七後單月新高，一半係投資客。
區內一個老牌投資者，亦重出江湖，上個月斥資一千二百萬，買咗四間屋短炒，成交期三至五個月，諗住升到三成就賣。
潘皜民話，之前買入錦綉嘅炒家，上個月都趁市道暢旺出貨獲利。其中M段單號屋，一千一百幾呎，剛以二百八十幾萬摸出，兩個月賺到十八萬。
潘皜民重話，呎價都比一月升咗五個巴仙，平均三千二百幾。佢預期，今個月呎價應該有機會再升半成。
唔好以為淨係電視台遊戲節目先至會送車送樓，地產代理為爭生意，同樣會搞送車優惠，吸引買家。美記舊年十月底攞到將軍澳廣場獨家代理權後，就搞咗個抽獎，送出一部價值十二萬嘅萬事得M2房車。
喺獨家期內，美記抽出二十位買家，噚日抽獎，先定每位買家揀車匙次序，然後順序試運氣。頭四位都失望而回，第五位揀咗條五號匙，隨即成功打開車門，攞咗部房車返屋企。
聽講，呢位買家舊年底用二百六十七萬，買入五座四十五樓G室。
南豐麥一擎話，成個將軍澳廣場，𠵱家剩番三十七伙，呎價近四千，趁住隔籬君傲灣同將軍澳豪庭就快開賣，會視乎反應，提高將廣售價，相信有條件加價半成到一成。
樓市上個月冇受農曆新年節日氣氛沖淡，利記噚日公布成績表，營業額有四千四百萬，比一月多二點三個巴仙，同舊年二月最旺嘅月份相比，都係有多無少，再創金融風暴後新高。利記廖偉強話，主要因為二手暢旺，佔營業額七成半。
利記今個月目標，提高到七千萬。
中記陳永傑宣布，二月生意一億四千八百五十萬，雖然比一月少近一成半，不過已經比佢哋原先預計嘅八、九千萬為佳。
電郵地址：
