大笨象滙控（005）賺成9百幾億大家都話唔滿意，拖累大市噚日急跌，跟手又話中石化（386）有策略投資者減持批股，此等消息真係影響投資氣氛。
經紀黃就話堅持炒股唔炒市，佢話最近留意緊亨泰消費品（197），佢話呢隻股喺早排無端端急跌，據講係有個基金換馬沽貨，所以股價由1.60元水平一度跌落1.24元，但查實亨泰在上周公布中期業績，盈利有成5468萬元，比去年升近5成，兼夾有0.5仙息派，照計冇理由咁弱。
好彩金手指都有同感，抱住人棄我取的態度，在此時密密增持，最新持股量已經去到接近10％，金手指坐得咁重貨，睇嚟都係諗住揸長線。咁啱前日有間美資行幫亨泰出報告，話佢業績表現理想，好過原先估計，並預期業務增長可以持續，將目標價set到成1.90元咁高。
幕後雙管齊下，亨泰噚日在跌市中，股價都升番3.1％，收1.33元，成交股數1042萬股，金額1382萬元。
慕容小初