阿董上神枱大海嘯，繼續引發大撕裂！金融界盛傳阿董今次收到壽爺眼神通知，自行了斷，由煲哥即時臨危受命接莊，玩住半年，再另行「選」過一名特首！
以往傳親阿董辭職，董團夥梗係即時強硬否認，並由親中土共勢力即時惡形惡相發動大謾罵，又話「別有用心」，又指「勾結外國勢力危害穩定」！嘿！點知今次奇怪喎，董辦竟然含羞萬狀，只係話「對於揣測不予回應」，而各線土共及挺董保皇分子亦紛紛收口扮啞，似係等待中央最高主人最新口令！
咦，乜唔係霍爺話頭：「我挺董」咩？乜唔係阿董其實冇錯，好叻，不過「冇自己班底」，「遭公務員架空」，無法施展所長咩？乜唔係「倒董即是顛覆祖國」咩？多年嘅宣傳謊言，行將一一自我踢爆，睇嚟金融界消息，可能來自北京嗰條線，又或者係富豪名流自我放出，又或者係土共自己放蟲，總之就開始有眉有目嘞！
消息人士指出：廢董去留，同佢嘅保家大佬江太祖去向有關！皆因為廢董係江太祖留低嘅炸彈，肥江不止交咗槍，三月兩會重要交埋個槍套，作為親自握手接生嘅話事人，做事自然要有手尾，江太祖爺爺正式全部、徹底、圓滿退任，抱起廢董呢個肥嘟嘟嘅小孫孫，塞個塑膠奶嘴入佢口，跟住爺孫倆向大地揮手微笑，作別天邊的雲彩，兩個身影，一大一細，漸漸消失在夕陽西下嘅東方地平線，跟住銀幕上打出「劇終」兩個字，咁係一啲都唔出奇！
除非咁咧──消息人士話──根據由美國佬用英語執筆嘅《江太祖傳記》，江太祖爺爺呢位改變中國的偉人，其實只係中場休息，去吓廁所，本傳記話，今後佢重對祖國發揮影響力，若然心想事成，「只要攞起個電話就夠了」，咁老董又未必使咁快同爺爺一齊作別地平線，反而會𦧲番個奶嘴出嚟，搥胸頓足，一直哭鬧到二○○七！
究竟係邊個版本至啱？八方想知，土共想知，煲哥同唐唐，全港七百萬人，包括揸定現金入股市嘅炒家，人人都想知！咁就要睇吓上高，壽爺同江太祖今勻又點樣「丟」法！（路邊社最新消息：壽爺成功踢走老董！）
不過，政協又名「人肉八寶山」，睇個勢，阿董做咗政協副主席，經已全身穿新衫，着新鞋，亦換過晒新片，奶嘴stand-by，聽啲配樂，睇埋畫面，戲院員工開定太平門，似係TheEnd多啲喎！
傳真︰2623-9278
電郵︰