富麗華酒店拆卸後，金鐘萬豪酒店之萬豪殿變成中環人飯堂。香格里拉之夏宮、港麗之金葉庭，價錢稍貴，以菜式比菜式，萬豪殿唔輸蝕，兼且地方較大，於是中午晚飯嘅生意最旺。
酒店Ｙ呢日請去萬豪殿食飯，與股神Ｐ見面。入到去，見到中國海外、葉氏化工佔咗兩個貴賓房，馮家彬、鄭耀棠議員、陳炳根（盈保）、VincentCheung（星展）等等各佔一桌，大家互相拜年，唔使預約。
股神Ｐ教路，如何捕捉濠賭股手影，增加額外收入。可惜左丁山對此完全無知，亦唔敢沾手，聽完都唔記上心頭。問股神Ｐ是否賺咗好多，佢話：「我知道有人賺到上山頂買大屋，不過我早已洗手，睇到都冇興趣落叠，既然已經做咗上市公司嘅獨立非執行董事，都係謹慎啲好，無謂俾人抓辮子。」
股神Ｐ縱橫股海二十幾年，攞完CPA牌，又到中大攞MBA、MSc，牌面十分夠照，不過股神Ｐ話：「讀書攞學位，鎮住吓嘅啫，搵銀最緊要膽大心細，打工最緊要熟讀帝王將相歷史，知所避忌。譬如太子登基，先王舊臣就要一一辭官歸故里，賴死唔走嘅，易招殺身之禍，其他啲皇子、公主都一一詐儍不問世事喇。」
聽完股神Ｐ咁講，與珠寶公子Ｌ飲茶時覆述之。太子Ｌ淡然話：「太陽之下無新事，歷史不斷重演，一個行家曾經唔掂，暫避鋒頭，生意交低畀個仔打理，個女輔助之。眨眼幾年後，生意復元，兒子領晒功，得銀行支持，穩握大權，行家出番嚟想話回朝復位，點知俾兒子拒諸門外，叫佢行開；個女呢，俾兒子貶送新界，憤而離職，行家惟有識趣，不問家庭生意事，否則每月俸祿都冇埋也。」