貿發局行政總裁林天福（圖）噚晚喺會展同傳媒春茗，佢嘅開場白真係別開生面，佢話，自己喺新正頭學人查找不足，發現貿發局犯咗兩宗罪，第一係官商勾結，第二係出賣香港，重大大聲話歡迎向老廉黃鴻超舉報。
嘩，林天福真係比施祖祥厲害，不過佢老兄開玩笑啫，所謂官商勾結，係講緊貿發局同啲商界合作無間，舊年全年，嚟參加佢哋主辦嘅展覽客人為香港帶來三十七億嘅旅遊收益；至於向海外推銷香港更係佢哋嘅天職，梗係唔怕老廉查啦。
林總咁風趣，大家問佢點睇前景，佢話香港舉辦展覽已經係六項冠軍，包括玩具、家居用品、鐘表、服裝、電子同埋禮品，佢梗係希望做埋世界第一啦。
不過，問題係唔夠地方，佢𠵱家等緊政府回覆，幾時批佢哋擴建，等佢哋有更多場地用。至於海外發展，佢就話會放棄好似新加坡呢啲已好成熟嘅市場，轉攻泰國同印度。
傳真︰2623-9278
電郵︰