農曆新年前，蘭西提過裕泰興九叔家族，喺深井大手掃貨，動用資金逾兩億，其中特別指定首選海雲軒，結果三日用咗逾一億一千萬，買入約四十個海雲軒單位；聽美聯分行經理羅志強講，九叔家族最近又再出手，向一個投資者接咗十一個海雲軒單位，涉資三千六百七十萬，睇嚟意猶未盡。
裕泰興𠵱家變成海雲軒嘅大業主，買家要買呢個盤，就一定要畀佢哋賺先至得嘞。
講番個賣家，埋單計數賺五六百萬，𠵱家手上重有一個海雲軒單位保留收租。呢個投資者一直用幾間公司名義入市，話事人姓陶，𠵱家手上仍揸住唔少物業，主要係新界區住宅，包括深井嘅浪翠園、碧堤半島同縉皇居、屯門聚康山莊同嘉悅半島，以及荃灣朗逸峯等。至於市區最貴重嘅係長沙灣嘉柏山。
中半山樓齡四十年以上嘅舊樓，近期接連獲得承接。聽講有個投資者睇準發展商喺未來幾年，會積極收購舊樓重建，於是物色高齡豪宅博收購。
過去兩日就斥資一千五百四十萬買入兩個單位，包括堅尼地道樓齡四十年嘅萬茂台二號中層單位，面積近二千呎，成交價七百四十萬，每呎三千七。另一個係麥當勞道錦輝大廈低層A室，一千六百呎，成交價八百萬元，呎價五千。
以現時堅尼地道樓齡較新嘅豪宅，呎價都過萬，預計兩三年後收購價至少升到每呎七八千蚊，升幅近一倍，又可以收租，都博得過。
樓市暢旺，發展商近排都好積極清貨尾，華懋噚日就委託中原，出任西貢花園獨家代理，唔講唔知，原來呢個入咗伙超過十年嘅樓盤，重有六十一個一手單位。華懋售樓部經理吳崇武話，今次推西貢花園，事緣農曆新年期間去視察，發覺中原新租嘅舖位就喺西貢花園樓下，入去查察後，就決定畀中原做銷售代理。
吳崇武話，首批推出十九伙，平均呎價二千八百零八蚊，最平單位一百八十餘萬，呎價最低二千五百幾蚊，重形容今次係「驚醒價」，比市價最少平兩成。
另外重提供三種付款方法，有首兩年免供本、二百七十天成交期，同埋有三個巴仙折扣即供九十天成交期。佢重話，下一批單位，就會加價一成。
至於中原都會有禮相贈，今個月送價值二萬蚊高爾夫球用品畀買家，名額五個。
舖市新力軍點心皇老闆馮偉開，剛以八千六百萬，買咗大鴻輝嘅北角酒樓舖位，喺地鐵站出口，一樓共萬六呎，租緊畀彩福海鮮酒家，月租三十九萬，十月約滿，回報率五厘四。
暫時重未知馮老闆想自用定投資，據美記講，老馮亦唔算投資初哥，兩年前以約二千萬買咗銅鑼灣糖街一個千三呎地舖收租，回報率有七厘幾。
講番業主大鴻輝，早前狙擊嘅全幢寫字樓，𠵱家當然水漲船高，就算好似呢個酒樓位散舖，一年賺千九萬，升值差唔多三成，十分唔錯。
動輒成千萬嘅大額豪宅，通常成交較慢，長實為咗加快九龍塘畢架山一號去貨速度，罕有地搞個送大禮比賽，凡喺今個月促成最多單位嘅地產代理，發展商就送價值二十四萬A200型號平治房車。
當然，唔係做一兩個單位，就可以話係全行最多，長實話至少要促成六個單位至合資格攞架平治走。
除咗比賽外，代理促成每單交易，有百分之一點五佣金外，重有勞力士收，聽聞隻表三萬至八萬蚊，做到三間以上，重有兩萬至五萬獎金。咁重本送大禮，無非想去貨。
電郵地址：
