鐵騎速報：<br>KawasakiKLE500全新中量級街爬高身高性能

鐵騎速報：
KawasakiKLE500全新中量級街爬高身高性能

鍾意爬雞嘅玩味又覺得其單薄外形唔順眼？喜歡街車嘅實用穩定又不甘於過份沉悶嘅操控性？好多鐵騎士嘅內心就係咁矛盾，就係咁三心兩意，所以近年街爬愈嚟愈受歡迎，唔少歐日名牌車廠都爭相推出不同級別多用途車款。Kawasaki一架05新款KLE500，係香港較少見嘅中量級道路越野兩用車種，無論外形、性能都集合晒越野車、街車嘅優點，搶眼嘅新造型更猶如Z1000嘅越野版，定必引得一班心繫Z1000、但又嫌大嫌貴嘅車迷心癢難耐。

記者：馬慶武
攝影：陳陶鈞
模特兒：Heidi

橙色車架搶晒鏡

見到KLE500嘅新造型，第一時間諗起同廠嘅街車Z1000，因為新車車頭嘅頭燈及小風擋設計極有Z1000嘅影子。新一代KLE明顯喺外形上尋求突破，車身顏色有兩種，黑橙及銀色同樣襯上橙色車架，搶眼得交關！
由車頭開始到油缸Fairing都好有街車Feel，不過行程較長嘅頭尾懸掛、越野車胎、頭尾高中間凹嘅Seat位、850mm座高，以及高置嘅排氣喉，都係比較偏向爬山車嘅設定。混合出嚟外形完全無突兀感，整體流線感極佳。

越野裝備機件篇

■身為中量級街爬，頭尾碟煞係必備配件。

■頭沙板頂端有漸變橙色作點綴，有心思！

■頭尾避震設定偏向越野車，就算面對崎嶇起伏路面都有好表現。

■引擎底有護罩，盡擋飛沙走石。

■尾喉雖然裝得高，但係設有隔熱板，後座乘客無咁易「辣」親腳。

■車尾沙板及尾燈都較為方角，盡顯越野本色。

街爬實用位出奇多

有番咁上下級數，設備當然唔失禮。現時流行嘅單眼仔頭燈，即低燈只會着一邊，唔算靚仔但有特色。橙底表板組合易睇又好睇，把手兩邊設有風擋，寒冷天氣下揸車對手唔會咁凍。斜前嘅後座有安全感坐得穩，最後更有越野車必備嘅行李架，就算唔裝尾箱都可以縛車冚、袋等雜物。如果裝埋尾箱，KLE嘅實用性高得緊要，不過外觀就無咁靚仔喇！

越野裝備　操控篇

■闊把手令到KLE500更易操控，揸長途亦都好舒服。

■裝有護手擋，冬天車唔使被冰凍寒風吹到應。

■原廠已裝有尾架，可以放下縛車冚，如果加尾箱亦唔使額外裝尾架，慳番唔少。

■KLE500座高有850mm，無番5呎10吋身高嘅車友，都好難可以雙腳同時點地。

凹凸路段發揮所長

以500cc級別電單車嚟講、KLE嘅操控性都好親民，181kg嘅車重、850mm嘅座高都無帶嚟任何壞影響，闊把手、窄車身更加係平易近人嘅元素。為咗達到歐盟二期廢氣規格標準，排氣喉較靜之外，最大馬力亦低過前一代幾匹，不過4.2kgm嘅扭力輸出，卻令KLE擁有頗佳加速力，尤其高轉時更加爽勁有力，愈扭愈有。油壓前叉、尾單筒避震調校得唔硬，配合21吋前轆，當遇到凹凸不平路段，就係KLE表現自己街爬優點嘅最好時機！

其他型仔位
■橙色底色嘅表板顯示清晰順眼，襯埋車身顏色真係型爆。

■左掣盒上嘅Pass掣即係閃燈掣，超車時可以提醒前車。

■498cc並列雙汽缸引擎，輸出力量充沛，而且唔算闊大，令車身保持苗條。

■頭尾鋼絲軨雖然好睇，但就唔可以變身日本勁興嘅爬雞跑胎。

■車頭入風位、小風擋、頭燈都與同廠Z1000好相似。

KawasakiKLE500Specifications

引擎：498cc四衝水冷DOHC並列雙汽缸
缸徑×衝程：74.0×58.0mm
壓縮比：9.8:1
馬力：45ps/8,300rpm
車架：高拉力鋼管雙搖籃式
傳動：6前速棍波
懸掛：套管油壓前叉（前）單筒油壓避震（後）
輪胎：90/90-21（前）130/80-17（後）
制動：碟式（前）碟式（後）
尺碼：2215×880×1270mm
軸距：1500mm
座高：850mm
車重：181kg
油缸容量：15公升
車輛提供：泰力摩托車中心（25122228）

■銀色唔夠黑橙車身咁撞色，但配上橙色車架一樣搶眼。