理工大學噚日頒發大學院士榮銜畀十三個對香港好有貢獻嘅人士，當中有衞生福利及食物局局長周一嶽。周局長就帶埋外籍妻子同囡囡出席頒授儀式，八方見到周局長上台攞證書嗰陣，周太同囡囡喺台下笑到見牙唔見眼，直情開心過局長。
而其他獲頒院士榮銜嘅，重有本港著名實業家田家炳、彩星集團創辦人陳大河，同埋啱啱過身嘅麗新集團創辦人林百欣。理大校長潘宗光話，同林伯相識多年，最欣賞林伯嘅係佢一顆對教育嘅善心。而因為林伯嘅喪禮重未舉行，佢啲家人都冇出席頒授儀式，潘校長話遲啲會搵人送番張證書畀林伯家人。唔講唔知，林伯除咗係生意人外，重好熱心公益，前前後後已經捐咗成六億畀內地同香港，全部都關於教育方面。
傳真︰2623-9278
電郵︰