噚日藝發局搞春茗，新主席馬逢國做主人家，八方梗係要畀面。八方問馬逢國，係咪一月一日上任，佢話，公開係咁講，但係其實老董一月二日先搵佢，信不信由你。咁老董乜都得，八方當然相信。
馬逢國身兼人大代表，所以佢聽日會隨大隊上京開會，至於藝發局副主席黃景強，亦都係政協委員，都會去埋北京。
八方問佢哋對於西九有乜高見，馬主席話佢哋希望三月底前會出到一份意見書。站喺藝發局立場，佢哋梗係想快啲有更多文化設施同場地，所以原則一定贊成，至於係唔係單一招標，馬主席就好小心話，佢未做呢個主席之前已經講有保留，因為佢好擔心一個商家能唔能夠有足夠投入，令計劃可以持續發展，多個商家係咪會好啲。
而工程界出身嘅黃景強更講笑話，連設計師Foster都冇諗過香港真係會起天篷，因為好多問題要解決。如果煲呔肯延長諮詢期，佢哋最開心，是關佢哋喺北京多過香港，好唔得閒。
傳真︰2623-9278
電郵︰