滙豐同恒生派成績表，係中環大事，關乎好多人身家，而噚日亦係恒生副董事長兼行政總裁鄭海泉，最後一次主持業績記者會，鄭大班話，喺恒生七年間，經歷過金融風暴，見到現在恒生比九八、九九年好咁多，真係要多謝恒生班同事七年嘅支持，至於對即將接任嘅柯清輝，佢都似乎冇畀太大壓力，重相信佢喺恒生會有好大嘅支持。
其實噚日都係艾爾敦喺滙豐最後一次主持業績記者會，佢個位遲啲就會由鄭海泉接任。講時講，其實佢哋兩位都係做到五月，所以大家重有多兩個幾月見到佢哋以現時嘅身份出現。
另外，滙控行政總裁葛霖喺滙豐嘅責任就愈嚟愈重。因為身兼北美滙豐控股和滙豐融資主席兼行政總裁嘅美國滙豐銀行主席嘅歐德章，今年四月二十九日會退休，而美國滙豐主席嘅位，就由葛霖兼任，即係佢𠵱家同時戴英國同美國滙豐主席兩頂帽。有記者忍唔住問葛霖：「你𠵱家身兼英國同美國滙豐主席，係咪為日後做集團主席鋪路呢？」當然，葛霖都唔會咁容易話「係」啦，只答「主席𠵱家重好繁忙！」
傳真︰2623-9278
電郵︰